കെ ഫോൺ പദ്ധതി: ജില്ലയിലെ 500 ഓഫീസുകൾക്ക് കണക്‌ഷൻ
കോഴിക്കോട്‌: കെ ഫോൺ പദ്ധതി: ജില്ലയിലെ 500 ഓഫീസുകൾക്ക് കണക്‌ഷൻ. കുറഞ്ഞ ചെലവിൽ അതിവേഗ ഇന്റർനെറ്റുമായി എൽ.ഡി.എഫ്‌ സർക്കാരിന്റെ കെ ഫോൺ (കേരള ഫൈബർ ഒപ്‌റ്റിക്കൽ നെറ്റ്‌വർക്ക്‌) പദ്ധതിയുടെ ആദ്യഘട്ടം ജില്ലയിൽ പൂർത്തിയായി. ജില്ലയിലെ 500 ഓഫീസുകളിലേക്ക്‌ കണക്‌ഷൻ നൽകി. സർക്കാർ ഓഫീസുകൾ, സ്‌കൂളുകൾ, അക്ഷയ കേന്ദ്രങ്ങൾ എന്നിവിടങ്ങളിലാണ്‌ കണക്‌ഷൻ നൽകിയത്‌. 50 ശതമാനം ഓഫീസുകളിലും സേവനം തുടങ്ങി. അവശേഷിക്കുന്നയിടങ്ങളിൽ പരിശോധന നടക്കുകയാണ്‌. അതിവേഗ ഇന്റർനെറ്റും മെയിന്റനൻസും നൽകുന്ന ‘ഗോ ലൈവ്‌’ സംവിധാനത്തിലേക്ക്‌ രണ്ടാഴ്‌ചക്കകം മാറും. 1000 എംബിപിഎസ്‌ വേഗമാണ്‌ ആദ്യഘട്ടത്തിൽ. കെഎസ്‌ഇബിയുടെ നേതൃത്വത്തിലാണ്‌ പദ്ധതി.
ഭെല്ലിനാണ്‌ നിർമാണച്ചുമതല. ആദ്യഘട്ടത്തിൽ 780 കിലോമീറ്റർ കേബിൾ വലിച്ചു. ചേവായൂരിലെ കോർപോപ്പും(ഇന്റർ കണക്‌ഷൻ നൽകുന്ന പ്രധാന കേന്ദ്രം) കിനാലൂർ, മേപ്പയ്യൂർ, ചക്കിട്ടപാറ, കൊടുവള്ളി, കൊയിലാണ്ടി എന്നിവിടങ്ങളിലെ അഗ്രിഗേഷൻ പോപ്പും (ഇന്റർനെറ്റ്‌ കണക്‌ഷൻ നൽകുന്ന ഉപകേന്ദ്രം) ഉൾപ്പെടുന്ന ഇടങ്ങളിൽ കേബിൾ ശൃംഖല പൂർത്തിയായി. ഇതിന്‌ കീഴിലെ ഓഫീസുകളിലാണ്‌ ഇപ്പോൾ കണക്‌ഷൻ ലഭിച്ചത്‌. രണ്ടാം ഘട്ടത്തിൽ 2100 കിലോമീറ്ററാണ്‌ കേബിൾ വലിക്കാനുള്ളത്‌. ഇതിൽ 1200 കിലോമീറ്റർ പൂർത്തിയായി.
