കൊടുവള്ളി വാവാട് തെയ്യത്തിൻ കാവ് ഭഗവതി ക്ഷേത്രത്തിൽ കവർച്ച നടത്തിയ പ്രതി പിടിയിൽ
.
കൊടുവള്ളി വാവാട് തെയ്യത്തിൻ കാവ് ഭഗവതി ക്ഷേത്രത്തിൽ കവർച്ച നടത്തിയ പ്രതി പിടിയിൽ. വയനാട് പടിഞ്ഞാറത്തറ സ്വദേശി ഇജ്ലാൽ (33) ആണ് പൊലീസ് പിടിയിലായത്. കഴിഞ്ഞ നാലാം തീയതി രാത്രിയാണ് ക്ഷേത്രത്തിലെ ഓഫീസിൻ്റെ വാതിലുകളുടെ പൂട്ട് തകർത്ത് അകത്തു കടന്ന പ്രതി ക്ഷേത്ര ഓഫീസിലെ ഷെൽഫിൽ സൂക്ഷിച്ച 20,000 രൂപയും, 10 ഗ്രാം സ്വർണവും കവർന്നത്. ഓഫീസിനകത്ത് സ്ഥാപിച്ചിരുന്ന സിസിടിവിയുടെ ഡിവിആർ അടിച്ചുമാറ്റി സമീപത്തെ വീട്ടുമുറ്റത്തെ കിണറ്റിൽ എറിയുകയും ചെയ്തു. തെളിവെടുപ്പിനിടെ കിണറ്റിൽ നിന്നും ഡിവിആർ പൊലീസ് കണ്ടെത്തി.
കോഴിക്കോട്, വയനാട് ജില്ലയ്ക്ക് പുറമെ സംസ്ഥാനത്തിൻ്റെ വിവിധ ഭാഗങ്ങളിൽ നിരവധി കവർച്ച കേസിലെ പ്രതിയാണ് ഇജ്ലാൽ. വയനാട്ടിൽ നടന്ന മോഷണക്കേസിൽ മീനങ്ങാടി പൊലീസിൻ്റെ പിടിയിലായ പ്രതി ചോദ്യം ചെയ്യലിനിടെയാണ് വാവാട് അമ്പലത്തിൽ മോഷണം നടത്തിയ വിവരം വെളിപ്പെടുത്തിയത്. 2022ലും പ്രതി ഇതേ അമ്പലത്തിൽ കവർച്ച നടത്തിയിരുന്നു. മീനങ്ങാടി പൊലീസ് പിടികൂടിയ പ്രതിയെ, കൊടുവള്ളി പൊലീസ് കസ്റ്റഡിയിൽ വാങ്ങിയാണ് തെളിവെടുപ്പിന് എത്തിച്ചത്.
