റെഡ് കർട്ടൻ കലാസമിതി സുവർണ്ണ ജൂബിലി ആഘോഷവും കായലാട്ട് രവീന്ദ്രൻ കെ.പി.എ.സി.യുടെ പന്ത്രണ്ടാം അനുസ്മരണവും
കൊയിലാണ്ടി: റെഡ് കർട്ടൻ കലാസമിതി സുവർണ്ണ ജൂബിലി ആഘോഷവും കായലാട്ട് രവീന്ദ്രൻ കെ.പി.എ.സി.യുടെ പന്ത്രണ്ടാം അനുസ്മരണവും ഡിസംബർ 23ന്.
കൊയിലാണ്ടിയിലെ സാമൂഹ്യ, സാംസ്ക്കാരിക രംഗത്തെ സജീവ സാന്നിദ്ധ്യമായിരുന്ന റെഡ് കർട്ടൻ പിറവി കൊണ്ടിട്ട് അൻപത് വർഷം പിന്നിടുകയാണ്. 1974 ഒക്ടോബറിൽ അന്നത്തെ സി.പി.എം സംസ്ഥാന സിക്രട്ടറിയായിരുന്ന ഇ.കെ നായനാരാണ് ഉദ്ഘാടനം ചെയ്തത്. എഴുത്തുകാരനും, ചിന്തകനുമായിരുന്ന പി. ഗോവിന്ദപ്പിള്ളയാണ് അന്ന് ഉദ്ഘാടന യോഗത്തിൽ അദ്ധ്യക്ഷത വഹിച്ചത്.
കൊയിലാണ്ടി ബാറിലെ അഡ്വക്കറ്റുമാരായ പരേതരായ എൻ.കെ. വിജയൻ ജന: സിക്രട്ടറിയും പ്രസിഡണ്ടായി എൻ. വി. ശ്രീധരൻ എന്നിവരായിരുന്നു ആദ്യ ഭാരവാഹികൾ. എൻ. കെ. വിജയൻ പിന്നീട് ജില്ലാ ജഡ്ജിയായിരുന്നു.
അമേച്വർ നാടക പ്രസ്ഥാനമായി വളർന്ന റെഡ് കർട്ടൻ ശ്രദ്ധേയമായ ഒട്ടനവധി നാടകങ്ങൾ അക്കാലത്ത് അരങ്ങിലെത്തിച്ചു. പ്രക്ഷോഭം, അതിരാത്രം, സനാതനം, ശൃംഖല, കാലം മാറുമ്പോൾ തുടങ്ങിയ നാടകങ്ങൾ കേരളത്തിലുടനീളം അവതരിപ്പിച്ചിരുന്നു.
പാഞ്ഞാളിൽ അന്നു നടന്നിരുന്ന അതിരാത്രത്തിന്റെ പശ്ചാത്തലത്തിൽ കായലാട്ട് രവീന്ദ്രൻ രചിച്ച് സംവിധാനം ചെയ്ത നാടകം അന്നു കേരളത്തിൽ സജീവ ചർച്ചയായിരുന്നു. നാടകാവതരണത്തിന് വലിയ എതിർപ്പുകൾ നേരിടേണ്ടി വന്നിരുന്നു. കൊയിലാണ്ടിയിലും പരിസരത്തുമുള്ള ഒട്ടേറെ കലാകാരന്മാരെ അരങ്ങിലെത്തിക്കാൻ റെഡ് കർട്ടന് സാധിച്ചിരുന്നു. വില്ലാപ്പള്ളി രാജൻ, പവിത്രൻ. സി.പി. രാഘവൻ, കോയച്ചം കണ്ടി രാഘവൻ, വിജയൻ അരങ്ങാടത്ത്, വി.കെ. രവി, അബ്ദുളള, അലി അരങ്ങാടത്ത്, രാഗം മുഹമ്മദലി, പികെ ഭരതൻ, ഗീത റീത്ത്, റീന, എൻ. കെ രവീന്ദ്രൻ, കാവും വട്ടം വാസുദേവൻ, കലാലയം രവി, തുടങ്ങി നിരവധി കലാകാരന്മാർ അരങ്ങിലും അണിയറയിലും ഉള്ളവരായിരുന്നു.
കേരളത്തിലെ പ്രധാന നാടക സംഘങ്ങളുടെ ഒട്ടുമിക്ക നാടകങ്ങളും അക്കാലത്ത് കൊയിലാണ്ടിയിലെ അരങ്ങിലെത്തിക്കാൻ റെഡ് കർട്ടന് കഴിഞ്ഞിരുന്നു. ഇതിനൊക്കെ നേതൃത്വം കൊടുത്തിരുന്നത് ചാത്തോത്ത് ശ്രീധരൻ നായർ എന്ന കമ്യൂണിസ്റ്റ് നേതാവായിരുന്നു. കുട്ടികളുടെ നേതൃത്വത്തിൽ റെഡ് കർട്ടൻ ചിൽഡ്രൻസ് വിംഗിന്റെ ആഭിമുഖ്യത്തിൽ കായികമേളകളും, ഫിലിം പ്രദർശനങ്ങളും നടത്തി. അരവിന്ദന്റെ കുമ്മാട്ടി പോലുള്ള സിനിമകൾ അക്കാലത്ത് കൊയിലാണ്ടിയിൽ പ്രദർശിപ്പിച്ചു.
കൊയിലാണ്ടിയിലെ പ്രശസ്ത മാധ്യമ പ്രവർത്തകനായ പവിത്രൻ മേലൂർ ഇത്തരം പ്രവർത്തനങ്ങൾക്ക് നേതൃത്വം നൽകി. സി.പി.എം നേതാവും മുൻ മന്ത്രിയുമായ ടി.പി. രാമകൃഷ്ണൻ MLA യുടെ വിവാഹം നടന്നത് അന്നത്തെ റെഡ് കർട്ടൻ ഹാളിൽ വെച്ചായിരുന്നു. ഒരു വർഷം നീണ്ടുനിൽക്കുന്ന സുവർണ്ണജൂബിലി ആഘോഷ വേളയിൽ പഴയ കാല പ്രവർത്തകരുടെ ഒത്തുചേരൽ, വൈവിധ്യമാർന്ന സാംസ്ക്കാരിക പരിപാടികൾ, വിദ്യാർത്ഥികൾക്കുള്ള ശില്പശാ
സുവണ്ണ ജൂബിലി ആഘോഷങ്ങളും, കായലാട്ട് രവീന്ദ്രൻ കെ.പി.എ.സി.യുടെ പന്ത്രണ്ടാം അനുസ്മരണവും ഡിസംബർ 23 ന് കൊയിലാണ്ടിയിൽ കേരള നിയമസഭ ഡെപ്യൂട്ടി സ്പീക്കർ ചിറ്റയം ഗോപകുമാർ ഉദ്ഘാടനം ചെയ്യും. കാനത്തിൽ ജമീല എം.എൽ.എ, ഇ.കെ.വിജയൻ എം.എൽ.എ, നഗരസഭാ ചെയർ പേഴ്സൺ സുധ കിഴക്കേപ്പാട്ട്, വി.ടി.മുരളി തുടങ്ങിയവരും കൊയിലാണ്ടിയിലെ സാമൂഹ്യ സാംസ്കാരിക മേഖലയിലെ പ്രതിനിധികളും പങ്കെടുക്കും, തുടർച്ചയായ സംസ്ഥാന തലത്തിൽ ചെണ്ടമേളത്തിന് സമ്മാനം കിട്ടുന്ന ജി.വി.എച്ച് എസ്സ്.എസ്സിലെ വിദ്യാർത്ഥികളേയും, അവരെ പരിശീലിപ്പിക്കുന്നതിൽ നേതൃത്വം കൊടുക്കുന്ന കളിപ്പുരയിൽ രവീന്ദ്രനേയും, ഏകാഭിനയ മികവിന് അലി അരങ്ങാടത്തിനേയും ആദരിക്കും. തുടർന്ന് കബീർ ഇബ്രാഹിം തലശ്ശേരി നയിക്കുന്ന ഗസൽ സന്ധ്യയും അരങ്ങേറും.
