ബലാത്സംഗക്കേസിൽ എൽദോസ്‌ കുന്നപ്പിള്ളിക്കെതിരെ ക്രൈംബ്രാഞ്ച്‌ കുറ്റപത്രം സമർപ്പിച്ചു
തിരുവനന്തപുരം: ബലാത്സംഗക്കേസിൽ യുഡിഎഫ്‌ എംഎൽഎ എൽദോസ്‌ കുന്നപ്പിള്ളിക്കെതിരെ ക്രൈംബ്രാഞ്ച്‌ കുറ്റപത്രം സമർപ്പിച്ചു. ബലാത്സംഗം, വധശ്രമം ഉൾപ്പെടെയുള്ള കുറ്റങ്ങളാണ്‌ ചുമത്തിയത്. അടിമലത്തുറ, തൃക്കാക്കര, കുന്നത്തുനാട്‌ എന്നിവിടങ്ങളിൽവെച്ചാണ്‌ ബലാത്സംഗം നടത്തിയത്‌. കോവളത്ത്‌ വെച്ച്‌ തള്ളിയിട്ട് കൊലപ്പെടുത്താൻ ശ്രമിച്ചെന്നും കുറ്റപത്രത്തിലുണ്ട്‌. എംഎൽഎയെ കൂടാതെ രണ്ട്‌ സുഹൃത്തുക്കളും പ്രതികളാണ്‌.
പരാതിക്കാരിയായ യുവതിയെ എംഎല്‍എ അടിമലത്തുറയിലെ റിസോര്‍ട്ടില്‍ വെച്ചാണ് ആദ്യം ബലാത്സംഗം ചെയ്തത്. 2022 ജൂലൈ 4-നായിരുന്നു ആദ്യ സംഭവം. തുടര്‍ന്ന് തൃക്കാക്കരയിലെ വീട്ടിലും കുന്നത്തുനാട്ടിലെ വീട്ടിലുംവെച്ച് ബലാത്സംഗം ചെയ്തുവെന്ന് കുറ്റപത്രത്തില്‍ പറയുന്നു. കോവളത്തുവെച്ച് യുവതിയെ തള്ളിയിട്ട് കൊല്ലാന്‍ ശ്രമിച്ചു. ഇതിന്റെ പേരിലാണ് വധശ്രമക്കുറ്റം ചുമത്തിയത്. യുവതിയുമായി എംഎല്‍എയ്ക്ക് അഞ്ചുവര്‍ഷത്തെ പരിചയമുണ്ടെന്ന് കുറ്റപത്രത്തില്‍ പറയുന്നു.
