സിപിഎം സംസ്ഥാന സെക്രട്ടേറിയേറ്റ് ഇന്ന്
തിരുവനന്തപുരം: പാര്‍ലമെന്‍റ് തെരഞ്ഞെടുപ്പിലേറ്റ കനത്ത പരാജയം ചര്‍ച്ച ചെയ്യുന്നതിനുള്ള സംസ്ഥാന കമ്മിറ്റിക്ക് മുന്‍പായി സിപിഎം സംസ്ഥാന സെക്രട്ടേറിയേറ്റ് ഇന്ന് യോഗം ചേരും. മുന്നണിയുടേയും പാര്‍ട്ടിയുടേയും തെരഞ്ഞെടുപ്പിലെ പ്രകടനത്തെക്കുറിച്ചുള്ള വിലയിരുത്തല്‍ റിപ്പോര്‍ട്ട് സെക്രട്ടേറിയറ്റ് തയ്യാറാക്കും. ഈ റിപ്പോര്‍ട്ട് വെള്ളി, ശനി ദിവസങ്ങളില്‍ നടക്കുന്ന സംസ്ഥാന സമിതി ചര്‍ച്ച ചെയ്യും.
കോണ്‍ഗ്രസിനെതിരായ പ്രചരാണം ഫലപ്രദമായി നടത്താന്‍ കഴിഞ്ഞില്ലെന്നതും വിശ്വാസികളില്‍ ഒരു വിഭാഗം എതിരായെന്നുമുള്ള പ്രാഥമിക വിലയിരുത്തല്‍ സംസ്ഥാന സെക്രട്ടേറിയറ്റ് തയ്യാറാക്കുന്ന റിപ്പോര്‍ട്ടിലും ഉണ്ടാകാനാണ് സാധ്യത. ദേശീയ നേതൃത്വത്തിന്‍റെ കോണ്‍ഗ്രസ് അനുകൂല നിലപാടും പരാജയത്തിന് കാരണമായെന്ന വിമര്‍ശനവും റിപ്പോര്‍ട്ടിലുണ്ടായേക്കും. സംസ്ഥാന സമിതിയുടെ അംഗീകാരത്തോടെ അടുത്ത മാസം ആറിന് ചേരുന്ന കേന്ദ്രകമ്മിറ്റി യോഗത്തില്‍ ഈ റിപ്പോര്‍ട്ട് അവതരിപ്പിക്കും.
