വധുവിനെ പെട്രോൾ ഒഴിച്ച് തീ കൊളുത്താൻ ശ്രമം
പയ്യോളി: വിവാഹം കഴിഞ്ഞ്‌ വരന്‍റെ വീട്ടിലേക്ക് പോകവെ വധുവിനെ പെട്രോൾ ഒഴിച്ച് തീ കൊളുത്താൻ ശ്രമം. നാട്ടുകാരുടെയും ബന്ധുക്കളുടെയും സമയോചിതമായ ഇടപെടലിൽ ദുരന്തം ഒഴിവായി. തീ കൊളുത്താന്‍ ശ്രമിക്കുന്നതിനിടെ പരുക്കേറ്റ തിരുവള്ളൂർ സ്വദേശി നിജേഷിനെ (31) മെഡിക്കൽ കോളജ് ആശുപത്രിയിൽ പ്രവേശിപ്പിച്ചു.
ഞായറാഴ്ച വൈകീട്ടാണ് നാട്ടുകാരെയും കല്ല്യാണ സൽക്കാരത്തിനെത്തിയവരെയും ഞെട്ടിച്ച സംഭവം നടന്നത്. വിവരമറിഞ്ഞ് സ്ഥലത്തെത്തിയ പൊലീസ് യുവാവില്‍ നിന്ന് കത്തിയും സിഗററ്റ് ലൈറ്ററും പിടികൂടി. പയ്യോളി പോലീസ് വധ ശ്രമത്തിന് കേസെടുത്തു.
ഞായറാഴ്ച രാവിലെ തിരുവള്ളൂരിലെ വധൂ ഗൃഹത്തിൽ നടന്ന വിവാഹത്തിന് ശേഷം വരന്‍റെ അയനിക്കാട്ടെ വീട്ടിലെത്തി കാറിൽ നിന്നിറങ്ങി പോകുമ്പോഴാണ് വധുവിന്‍റെ ശരീരത്തിലേക്കും വസ്ത്രത്തിലേക്കും യുവാവ് പെട്രോൾ ഒഴിച്ച് തീകൊളുത്താൻ ശ്രമിച്ചത്.
