മാലിന്യം തള്ളിയ സംഭവം: നിക്ഷേപിച്ചവരെ വരുത്തിച്ച് മാലിന്യങ്ങള് തിരിച്ചെടുപ്പിച്ചു
രാമനാട്ടുകര : കോഴിക്കോട് സിറ്റി സ്റ്റാന്റിനടുത്തുള്ള അഡ്രസ് മാളില് നിന്ന് മാലിന്യം രാമനാട്ടുകര നഗരസഭയിലെ പരുത്തിപാറയിലെ സ്വകാര്യ വ്യക്തിയുടെ പറമ്പിലും പാതയോരത്തും തള്ളിയ സംഭവത്തില് നിക്ഷേപിച്ചവരെ വരുത്തിച്ച് മാലിന്യങ്ങള് തിരിച്ചെടുപ്പിച്ചു.
രാമനാട്ടുകര നഗരസഭ ഈ കടകള്ക്കെതിരെ പിഴ ചുമത്തും. ബുധനാഴ്ച ഫറോക്ക് പൊലീസിന്റെയും ജനപ്രതിനിധികളുടെയും സാന്നിധ്യത്തിലാണ് മാലിന്യങ്ങള് തിരിച്ചെടുപ്പിച്ചത്. അഡ്രസ് മാളില് നിന്ന് 30,000 രൂപയ്ക്ക് മാലിന്യം നീക്കാന് കരാറെടുത്തയാള് ഫറോക്ക് ചുങ്കം സ്വദേശി നൗഷാദിന് 15000 രൂപയ്ക്ക് മറിച്ച് കരാര് നല്കുകയായിരുന്നു.
നൗഷാദാണ് ശേഖരിച്ച മാലിന്യങ്ങള് കോടമ്പുഴ പള്ളിമേത്തല് പാതയോരത്തും പരുത്തിപ്പാറക്കടുത്ത് കുറുപ്പന് പടിയിലെ സ്വകാര്യ വ്യക്തിയുടെ പറമ്പിലും തള്ളിയതത്രെ. കഴിഞ്ഞ ദിവസമാണ് ചാക്കുകളില് നിറച്ച മാലിന്യങ്ങള് നാട്ടുകാരുടെ ശ്രദ്ധയില്പ്പെട്ടത്. നാട്ടുകാര് ചാക്കുകള് പരിശോധിച്ചപ്പോഴാണ് നഗരത്തിലെ അഡ്രസ് മാളിലെ കടകളിലെ ബില്ലുകള് കണ്ടെത്തിയത്.
തുടര്ന്ന് ബില്ലുകള് സ്ഥലത്തെത്തിയ ഫറോക്ക് പൊലിസിന് കൈമാറി. പൊലീസ് നടത്തിയ അന്വേഷണത്തില് മാളിലേതാണ് മാലിന്യങ്ങള് എന്ന് കണ്ടെത്തി. നഗരസഭ വൈസ് ചെയര്പേഴ്സണ് എം.സജിന, കൗണ്സിലര്മാരായ കെ.അബ്ദുള് ഫൈസല്, ടി. റസാഖ് എന്നിവരുടെ നേതൃത്വത്തിലായിരുന്നു നടപടികള്.