പ്രിയങ്ക ഗാന്ധിയെ പോലീസ് കരുതല്‍ കസ്റ്റഡിയിലെടുത്തു
ഉത്തര്‍പ്രദേശ്: മിര്‍സാപൂരിലെ സോന്‍ഭദ്രയില്‍ ഭൂമി തര്‍ക്കത്തെ തുടര്‍ന്നുണ്ടായ വെടിവെയ്പ്പില്‍ കൊല്ലപ്പെട്ടവരുടെ കുടുംബത്തെ സന്ദര്‍ശിക്കാനെത്തിയ എഐസിസി ജനറല്‍ സെക്രട്ടറി പ്രിയങ്ക ഗാന്ധിയെ പോലീസ് കരുതല്‍ കസ്റ്റഡിയിലെടുത്തു. സ്ഥലത്തെ സംഘര്‍ഷ സാധ്യത കണക്കിലെടുത്താണ് മിര്‍സാപുര്‍ പോലീസ് പ്രിയങ്കയെ തടഞ്ഞ് കരുതല്‍ കസ്റ്റഡിയിലെടുത്തത്. മിര്‍സാപൂരില്‍ നിരോധനാജ്ഞ പ്രഖ്യാപിക്കുകയും ചെയ്തിട്ടുണ്ട്.
മിര്‍സാപൂരിലെത്തിയ പ്രിയങ്കയെ പോലീസ് തടഞ്ഞതോടെ നേതാക്കള്‍ക്കൊപ്പം അവര്‍ റോഡില്‍ കുത്തിയിരുന്ന് പ്രതിഷേധിച്ചു. ഇതിനു പിന്നാലെ പ്രിയങ്കയെ പോലീസ് കസ്റ്റഡിയിലെടുക്കുകയായിരുന്നു. കഴിഞ്ഞ ദിവസമുണ്ടായ സംഘര്‍ഷത്തില്‍ പത്ത് പേരാണ് മിര്‍സാപൂരില്‍ കൊല്ലപ്പെട്ടത്. 24 പേര്‍ ഗുരുതരാവസ്ഥയിലാണ്.
കൊല്ലപ്പെട്ടവരുടെ കുടുംബത്തെ കാണണമെന്നുമാത്രമാണ് താന്‍ ആവശ്യപ്പെട്ടത്. നാലു പേരെ മാത്രമേ ഒപ്പം കൊണ്ടുപോവുകയുള്ളുവെന്നും പറഞ്ഞിരുന്നു . അത് കേള്‍ക്കാന്‍ അധികൃതര്‍ തയാറായില്ല- പ്രിയങ്ക കുറ്റപ്പെടുത്തി. എവിടേക്കാണ് തന്നെ കൊണ്ടു പോകുന്നതെന്ന് അറിയില്ലെന്നും എവിടേക്കാണെങ്കിലും പോകാന്‍ തയാറാണെന്നും പോലീസ് വാഹനത്തില്‍ വച്ച്‌ പ്രിയങ്ക മാധ്യമങ്ങളോട് പറഞ്ഞു.
