പോണ്ടിച്ചേരിയില്‍ ഇരുചക്രവാഹനം ഓടിക്കുന്നവർക്ക് ഹെല്‍മറ്റ് നിര്‍ബന്ധമാക്കുന്നു
പോണ്ടിച്ചേരി: മേഖലയിൽ ഇരുചക്രവാഹനം ഓടിക്കുന്നവർക്ക് ഹെൽമറ്റ് നിർബന്ധമാക്കുന്നു. മേയ് ഒന്നുമുതൽ ഇരുചക്രവാഹനം ഓടിക്കുന്നവർ നിർബന്ധമായും ഹെൽമറ്റ് ഉപയോഗിക്കണമെന്നു ട്രാൻസ്പോർട്ട് കമ്മീഷ്ണർ എസ്.ഡി. സുന്ദരേശ്വൻ അറിയിച്ചു. എല്ലാ ഡിപ്പാർട്ടുമെന്‍റുകൾക്കും ഇതു സംബന്ധിച്ച നിർദേശം നൽകിയതായും അദ്ദേഹം പറഞ്ഞു.
ഹെൽമറ്റ് ധരിക്കാതെ വാഹനം ഓടിക്കുന്നവരിൽനിന്നു 100 രൂപ പിഴയിടാക്കാനും തീരുമാനിച്ചു. നിയമലംഘനം ആവർത്തിക്കുകയാണെങ്കിൽ 300 രൂപ പിഴയിടാക്കുമെന്നും സുന്ദരേശ്വരൻ പറഞ്ഞു.
ഇരുചക്രവാഹന യാത്രക്കാർ നിരവധി പേരാണു റോഡപകടങ്ങളിൽ മരണപ്പെടുന്നത്. അതിനാൽ ഇരുചക്രവാഹനം ഓടിക്കുന്നവർക്കു ഹെൽമറ്റ് നിർബന്ധമാക്കണമെന്നു മുഖ്യമന്ത്രി നിർദേശം നൽകിയിരുന്നു. ഇതേ തുടർന്നാണ് നടപടിയെന്നും സുന്ദരേശ്വൻ പറഞ്ഞു.
