അധ്യാപകന്‍ പരീക്ഷ എഴുതിയ സംഭവത്തില്‍ ഫലം തടഞ്ഞുവച്ച പ്ലസ് വണ്‍ വിദ്യാര്‍ത്ഥികള്‍ ആശങ്കയില്‍
കോഴിക്കോട്: നീലേശ്വരം സ്കൂളില്‍ അധ്യാപകന്‍ പരീക്ഷ എഴുതിയ സംഭവത്തില്‍ ഫലം തടഞ്ഞുവച്ച പ്ലസ് വണ്‍ വിദ്യാര്‍ത്ഥികള്‍ ആശങ്കയില്‍. കൊമേഴ്സ് വിഭാഗത്തിലെ രണ്ട് കുട്ടികളുടെ ഫലമാണ് തടഞ്ഞ് വച്ചിരിക്കുന്നത്. ജൂണ്‍ ആറിന് പ്ലസ്ടു ക്ലാസ് തുടങ്ങാനിരിക്കെ എന്ത് ചെയ്യണമെന്നറിയാത്ത അവസ്ഥയിലാണ് വിദ്യാര്‍ത്ഥികള്‍.
നീലേശ്വരം സ്കൂളിലെ പ്ലസ്ടു സയന്‍സ് വിഭാഗത്തിലെ മൂന്ന് കുട്ടികളുടെ ഉത്തരക്കടലാസുകള്‍ പൂര്‍ണ്ണമായും മാറ്റി എഴുതുകയും പ്ലസ് വണ്ണിലെ 32 ഉത്തരക്കടലാസുകളില്‍ അധ്യാപകന്‍ തിരുത്തല്‍ വരുത്തിയെന്നുമാണ് വിദ്യാഭ്യാസ വകുപ്പ് കണ്ടെത്തിയത്. ഇതില്‍ പ്ലസ് വണ്‍ കൊമേഴ്സിലെ രണ്ട് കുട്ടികളുടെ പരീക്ഷ ഫലം ഇനിയും പ്രസിദ്ധീകരിച്ചിട്ടില്ല. കൂടുതല്‍ തിരുത്തല്‍ വരുത്തിയതിനാല്‍ വിശദമായ പരിശോധന വേണമെന്ന നിലപാടിലാണ് ഇപ്പോഴും വിദ്യാഭ്യാസ വകുപ്പ്.
മറ്റ് കുട്ടികളുടെ പരീക്ഷാ ഫലം അധ്യാപകന്‍ തിരുത്തിയ മാര്‍‍ക്ക് ഒഴിവാക്കി പ്രസിദ്ധീകരിച്ചിരുന്നു. പ്ലസ് വണ്ണിലെ രണ്ട് കുട്ടികള്‍ ഇംപ്രൂവ്മെന്‍റ് പരീക്ഷ എഴുതണമെങ്കില്‍ പോലും വൈകാതെ ഫലം അറിയേണ്ടതുണ്ട്. പ്ലസ് വണ്‍ ഇംപ്രൂവ്മെന്‍റ് പരീക്ഷ ജൂലൈ കഴിഞ്ഞാണ് നടക്കുക. അതിനു മുന്നേ ഫലം പ്രസിദ്ധീകരിക്കുമെന്നും വിദ്യാര്‍ത്ഥികള്‍ക്ക് ആശങ്ക വേണ്ടെന്നും ഹയര്‍ സെക്കന്‍ഡറി റീജണല്‍ ഡെപ്യൂട്ടി ഡയറക്ടര്‍ അറിയിച്ചു.
