സിന്തറ്റിക് വിഭാഗത്തില്‍ ഉള്‍പ്പെട്ട മാരക മയക്കുമരുന്നുമായി യുവാവ് പിടിയില്‍
പാലക്കാട്: ജില്ല ലഹരി വിരുദ്ധ സ്ക്വാഡും ടൗണ്‍ നോര്‍ത്ത് പൊലീസും ചേര്‍ന്ന് നടത്തിയ വാഹന പരിശോധനയില്‍ സിന്തറ്റിക് വിഭാഗത്തില്‍ ഉള്‍പ്പെട്ട മാരക മയക്കുമരുന്നുമായി യുവാവിനെ പിടികൂടി.
പാലക്കാട് മുത്താന്‍തറ സ്വദേശി കിളി എന്ന ശ്രീകുമാറാണ് (25) അറസ്റ്റിലായത്. ചൊവ്വാഴ്ച ഉച്ചയോടെ ഒലവക്കോട് നടത്തിയ വാഹനപരിശോധനയിലാണ് ശരീരത്തില്‍ പൗച്ചിലാക്കി ഒളിപ്പിച്ച നിലയില്‍ 1.5 ഗ്രാം എം.ഡി.എം.എ.യുമായി ബൈക്കില്‍ വന്ന ശ്രീകുമാര്‍ പിടിയിലായത്.
ഗ്രാമിന് 4000 രൂപ വിലയ്ക്ക് കോയമ്ബത്തൂരുള്ള ഏജൻ്റ് വഴിയാണ് മയക്കുമരുന്ന് ലഭിച്ചതെന്ന് ശ്രീകുമാര്‍ മൊഴി നല്‍കിയിട്ടുണ്ട്. ഇങ്ങനെ എത്തിക്കുന്ന മയക്കുമരുന്ന് മറ്റുള്ളവര്‍ക്ക് വില്‍പന നടത്തിയതായും പൊലീസ് സംശയിക്കുന്നുണ്ട്. വിവിധ ലഹരി മരുന്നുകള്‍ക്ക് അടിമയാണ് ശ്രീകുമാറെന്ന് പൊലീസ് പറഞ്ഞു.
