കേരളത്തെ കൂടുതല്‍ സുന്ദരമാക്കാന്‍ വിദ്യാര്‍ഥികളുടെ നിര്‍ദേശങ്ങള്‍ ക്ഷണിച്ച് മുഖ്യമന്ത്രി
കോഴിക്കോട് > പുതിയ കേരളസൃഷ്ടിക്കായി വിദ്യാര്‍ഥികളുടെ അഭിപ്രായങ്ങളും നിര്‍ദേശങ്ങളും ക്ഷണിച്ചുകൊണ്ടുളള മുഖ്യമന്ത്രി പിണറായി വിജയന്റെ സന്ദേശം ജില്ലയിലെ വിദ്യാലയങ്ങളില്‍ അസംബ്ളികളില്‍ വായിച്ചു. ജില്ലാതല പരിപാടി കോഴിക്കോട് തളി സാമൂതിരി ഹൈസ്കൂളില്‍ ജില്ലാ പഞ്ചായത്ത് പ്രസിഡന്റ് ബാബു പറശ്ശേരി ഉദ്ഘാടനംചെയ്തു. മുഖ്യമന്ത്രിയുടെ സന്ദേശം അദ്ദേഹം വായിച്ചു. തലമുറയെ ശരിയായി രൂപപ്പെടുത്തിയെടുക്കാനുള്ള ഇടപെടലാണ് സര്‍ക്കാര്‍ നടത്തുന്നതെന്ന് അദ്ദേഹം പറഞ്ഞു.
വിദ്യാര്‍ഥികളില്‍ പരിസ്ഥിതിസ്നേഹം വളര്‍ത്തുന്നതിന് ലക്ഷ്യമിടുന്നതാണ് മുഖ്യമന്ത്രിയുടെ സന്ദേശം. കാടും മലയും പുഴയും വയലും കായലും അറബിക്കടലും ചേര്‍ന്നനുഗ്രഹിച്ച കേരളത്തെ കൂടുതല്‍ സുന്ദരമാക്കാന്‍ വിദ്യാര്‍ഥികളുടെ നിര്‍ദേശങ്ങള്‍ ക്ഷണിക്കുകയാണ് മുഖ്യമന്ത്രി.
പ്രാണവായുവും ജലവും കൂടുതല്‍ ലഭിക്കാന്‍ മരങ്ങള്‍ വച്ചുപിടിപ്പിക്കുന്നതിനും പ്ളാസ്റ്റിക് ഉപയോഗം കുറയ്ക്കുന്നതിനും കുപ്പികളും മാലിന്യങ്ങളും വലിച്ചെറിയാതിരിക്കുന്നതിനും മുഖ്യമന്ത്രി നിര്‍ദേശിച്ചു. അന്യ സംസ്ഥാനങ്ങളെ ആശ്രയിക്കാതെ പച്ചക്കറികളുടെ കാര്യത്തില്‍ സ്വയം പര്യാപ്തമാവുന്നതിനും ജലസ്രോതസ്സുകള്‍ വരും തലമുറയ്ക്കുവേണ്ടി കരുതിവയ്ക്കണം. വിദ്യാര്‍ഥികളുടെ മികച്ച അഭിപ്രായങ്ങളും നിര്‍ദേശങ്ങളും തെരഞ്ഞെടുത്ത് ജില്ലാ തലത്തിലും സംസ്ഥാനതലത്തിലും സമ്മാനങ്ങള്‍ നല്‍കും.
വിദ്യാര്‍ഥികള്‍ക്കായി വിവര പൊതുജന സമ്പര്‍ക്ക വകുപ്പ് തയാറാക്കിയ വിവിധ സന്ദേശങ്ങള്‍ ഉള്‍ക്കൊള്ളുന്ന നെയിംസ്ളിപ്പുകള്‍ ജില്ലാ ഇന്‍ഫര്‍മേഷന്‍ ഓഫീസര്‍ കെ ടി ശേഖര്‍ സ്കൂള്‍ വിദ്യാര്‍ഥിനിക്ക് നല്‍കി പ്രകാശനംചെയ്തു. ജില്ലാ വിദ്യാഭ്യാസ ഉപഡയറക്ടര്‍ ഡോ. ഗിരീഷ് ചോലയില്‍ അധ്യക്ഷനായി. സ്കൂള്‍ ഹെഡ്മാസ്റ്റര്‍ വി ഗോവിന്ദന്‍, പ്രിന്‍സിപ്പല്‍ മുരളിമോഹന്‍, എസ്എസ്എ പ്രോഗാം ഓഫീസര്‍ വി വസീഫ്, പിടിഎ പ്രസിഡന്റ് സജീവ്, മദര്‍ പിടിഎ പ്രസിഡന്റ് സിന്ധു സുനില്‍കുമാര്‍ എന്നിവര്‍ സംസാരിച്ചു.
