ഇന്ത്യയിലെ മറ്റൊരു തുറമുഖത്തിലും ഇല്ലാത്ത സാങ്കേതിക സംവിധാനമാണ് വിഴിഞ്ഞത്തുള്ളത്
ഇന്ത്യയിലെ മറ്റൊരു തുറമുഖത്തിലും ഇല്ലാത്ത സാങ്കേതിക സംവിധാനമാണ് വിഴിഞ്ഞത്തുള്ളതെന്ന് കരണ്‍ അദാനി. ഞങ്ങളുടെ മുദ്ര പോർട്ടിൽ പോലും ഇത്രയും സംവിധാനമില്ലെന്നും, സർക്കാരിന്റെ ഇച്ഛാ ശക്തികൊണ്ടാണ് തുറമുഖം യാഥാർത്ഥ്യമായതെന്നും ട്രയൽ റൺ ഉദ്‌ഘാടന വേദിയിൽ കരണ്‍ അദാനി പറഞ്ഞു.
കേരള സർക്കാരിന്റെ ഇച്ഛാശക്തികൊണ്ടാണ് വിഴിഞ്ഞം പദ്ധതി യാഥാർത്ഥ്യമായതെന്ന് കേന്ദ്രമന്ത്രി സർബാനന്ദ സോനോവാൾ വേദിയിൽ പറഞ്ഞു. ലോക തുറമുഖ ഭൂപടത്തിൽ വിഴിഞ്ഞം ഒന്നാമത്തെത്തുമെന്നും അദ്ദേഹം പറഞ്ഞു. തുറമുഖത്തിന്റെ ട്രയൽ റൺ ഉദ്‌ഘാടനത്തിനിടെയായിരുന്നു സംസ്ഥാന സർക്കാരിനെ പ്രശംസിച്ചുകൊണ്ടുള്ള സർബാനന്ദ സോനോവാളിന്റെ വാക്കുകൾ.
വിഴിഞ്ഞം തുറമുഖം വഴി വാണിജ്യ തൊഴിൽ മേഖലയിൽ വരാനിരിക്കുന്നത് വലിയ സാധ്യതകളാണെന്ന് മന്ത്രി വി എൻ വാസവൻ പറഞ്ഞു. ചരിത്രനിമിഷത്തിനാണ് വിഴിഞ്ഞം സാക്ഷി ആയിരിക്കുന്നതെന്നും, ഏറെ അഭിമാനത്തോടെയാണ് മദർഷിപ്പിനെ കേരളം സ്വീകരിച്ചിരിക്കുന്നതെന്നും ട്രയൽ റൺ ഉദ്‌ഘാടന വേദിയിൽ വെച്ച് മന്ത്രി പറഞ്ഞു.
വിഴിഞ്ഞം പോലുള്ള തുറമുഖം ലോകത്ത് തന്നെ അപൂർവമെന്ന് മുഖ്യമന്ത്രി പിണറായി വിജയൻ. വിഴിഞ്ഞം തുറമുഖം യാഥാർഥ്യമാക്കാൻ സഹായിച്ചവർക്കും പിന്തുണ നൽകിയവർക്കും കൃതജ്ഞത അറിയിക്കുന്നുവെന്നും കേരളത്തിലെ വികസന അധ്യായതിന് പുതിയ ഏട് ഇവിടെ ആരംഭിക്കുകയാണെന്നും ട്രയൽ റൺ ഉദ്‌ഘാടന വേദിയിൽ മുഖ്യമന്ത്രി പറഞ്ഞു.
