കോയമ്പത്തൂരിൽ ഈ വർഷം മാത്രം ഇരുന്നൂറിലധികം പോക്‌സോ കേസുകൾ രജിസ്റ്റർ ചെയ്‌തതായി പൊലീസ്
കോയമ്പത്തൂർ: കോയമ്പത്തൂരിൽ ഈ വർഷം മാത്രം ഇരുന്നൂറിലധികം പോക്‌സോ കേസുകൾ രജിസ്റ്റർ ചെയ്‌തതായി പൊലീസ് സൂപ്രണ്ട് ബദ്രി നാരായണൻ. എല്ലാ മാതാപിതാക്കളും തങ്ങളുടെ കുട്ടികളെ നല്ല സ്‌പർശനത്തെയും മോശം സ്‌പർശനത്തെയും കുറിച്ച്‌ പഠിപ്പിക്കണം. കൗമാരപ്രായത്തിലുള്ള കുട്ടികളുടെ എല്ലാ മാതാപിതാക്കളും അവരുമായി ജീവിതത്തെക്കുറിച്ച് സംസാരിക്കാൻ ദിവസവും കുറച്ച് സമയം ചെലവഴിക്കണമെന്നും ബദ്രി നാരായണൻ മാധ്യമങ്ങളോട്‌ പറഞ്ഞു.
ഈ വർഷം മാത്രം 40 കൊലപാതകങ്ങൾ നടന്നു. ഇതിൽ 12 കൊലപാതകങ്ങൾ കുടുംബത്തിനുള്ളിലും ചില കൊലപാതകങ്ങൾ സുഹൃത്തുക്കൾക്കിടയിലുമാണ് നടന്നത്. അടുത്ത കാലത്തായി കോയമ്പത്തൂരിൽ ഓൺലൈൻ തട്ടിപ്പുകളും തൊഴിൽ തട്ടിപ്പുകളും നിരന്തരമായി നടക്കുന്നു. ഇത്തരം തട്ടിപ്പുകളിൽ ജനങ്ങൾ വഞ്ചിതരാകരുത്. ഈ വർഷം മാത്രം 18 കോടി രൂപയാണ് സൈബർ കുറ്റകൃത്യങ്ങളിൽ കോയമ്പത്തൂരിലെ ജനങ്ങൾക്ക് നഷ്‌ടമായത്.
ടെലിഗ്രാം ലിങ്കുകളിൽ ചേരരുത്, പണം നിക്ഷേപിച്ച് വഞ്ചിക്കപ്പെടരുത്. 2023ൽ മാത്രം 1853 മൊബൈൽ ഫോണുകൾ കാണാതായതായി അദ്ദേഹം പറഞ്ഞു. ഇതിൽ പകുതിയും കണ്ടെടുത്തു ഉടമകൾക്ക് കൈമാറി. കോയമ്പത്തൂർ ജില്ലാ പൊലീസിന് വേണ്ടി 41 ഇരുചക്ര പട്രോളിംഗ് വാഹനങ്ങളും 13 ഫോർ വീലർ പട്രോളിംഗ് വാഹനങ്ങളും പട്രോളിംഗ് ചുമതലകൾ നിർവഹിക്കുന്നു.
ഇത് കുറ്റവാളികളെ പിടികൂടുന്നത് എളുപ്പമാക്കുന്നു. കോയമ്പത്തൂർ ജില്ലയിൽ ശൈശവ വിവാഹങ്ങൾ കുറവാണെങ്കിലും പോക്‌സോ കേസുകൾ കൂടുതലായി റിപ്പോർട്ട് ചെയ്യപ്പെടുന്നുണ്ടെന്നും ഈ വർഷം മാത്രം 205 പോക്‌സോ കേസുകൾ റിപ്പോർട്ട് ചെയ്‌തിട്ടുണ്ടെന്നും അദ്ദേഹം പറഞ്ഞു.
