കൊയിലാണ്ടി നഗരസഭ ശുചിത്വ ഭവന പ്രഖ്യാപനം നടത്തി
കൊയിലാണ്ടി: നഗരസഭയിലെ മികച്ച ശുചിത്വ ഭവനങ്ങളുടെ പ്രഖ്യാപനം നഗരസഭ അധ്യക്ഷ സുധ കിഴക്കേപ്പാട്ട് നിർവ്വഹിച്ചു. ഇരുപതിനായിരത്തിൽ പരം വീടുകളിൽ കുടുംബശ്രീ പ്രവർത്തകരും ശുചിത്വ വളണ്ടിയർമാരും ഹെൽത്ത് ഇൻസ്പെക്ടർമാരും സംയുക്തമായി ശുചിത്വ പരിശോധന നടത്തിയാണ് മികച്ച 10 ശുചിത്വ ഭവനങ്ങളെ തിരഞ്ഞെടുത്തത്. കുടുംബശ്രീയുടെ സഹകരണത്തിൽ നടപ്പിലാക്കിയ ശുചിത്വ ഭവനം പദ്ധതിയിൽ അയൽക്കൂട്ടതലത്തിൽ നിന്ന് തെരഞ്ഞെടുത്ത 718 അയൽക്കൂട്ട ശുചിത്വ ഭവനങ്ങൾക്ക് സർട്ടിഫിക്കറ്റുകളും വിതരണം ചെയ്തു.
ഏറ്റവും നല്ല ശുചിത്വ ഭവനത്തിന് കൊയിലാണ്ടിയിലെ ത്രിമൂർത്തി ഗോൾഡ് & ഡയമണ്ട്സുമായി ചേർന്ന് സ്വർണ്ണനാണയം സമ്മാനമായി നൽകി. ടൗൺഹാളിൽ തിങ്ങിനിറഞ്ഞ സദസ്സിന്റെ സാന്നിധ്യത്തിൽ വൈസ് ചെയർമാൻ അഡ്വ. കെ. സത്യൻ അധ്യക്ഷത വഹിച്ചു. നവകേരളം കർമ്മപദ്ധതി ജില്ലാ കോഡിനേറ്റർ പി.ടി. പ്രസാദ് മുഖ്യ അതിഥിയായി സംസാരിച്ചു.
സ്ഥിരം സമിതി അധ്യക്ഷരായ കെ.എ. ഇന്ദിര, കെ.ഷിജു, ഇ.കെ.അജിത്ത്, നിജില പറവക്കൊടി, സി.പ്രജില, കൗൺസിലർമാരായ വി.പി ഇബ്രാഹിംകുട്ടി, വൽസരാജ് കേളോത്ത്, കെ.കെ വൈശാഖ്, നഗരസഭ സെക്രട്ടറി ഇന്ദു എസ്. ശങ്കരി കെ.എ.എസ്, പ്രകാശ് (ജെ.ഡി. ഓഫീസ്), ജാനറ്റ് (കെ.എസ്.ഡബ്ല്യു.എം.പി), സി.ഡി.എസ് അധ്യക്ഷരായ കെ. കെ വിപിന, എം.പി. ഇന്ദുലേഖ, നഗരസഭ ക്ലീൻ സിറ്റി മാനേജർ ടി.കെ. സതീഷ് കുമാർ എന്നിവർ സംസാരിച്ചു.
100 മാർക്കിനുള്ള 12 ചോദ്യങ്ങൾ അടങ്ങിയ ചോദ്യാവലിയുമായാണ് ഓരോ വീടുകളിലും പരിശോധന സംഘം കയറിയത്. അജൈവ മാലിന്യങ്ങൾ ഹരിത കർമ്മ സേനയ്ക്ക് കൈമാറുന്നുണ്ടോ, ജൈവമാലിന്യം ശാസ്ത്രീയമായി സംസ്കരിക്കുന്നുണ്ടോ, ദ്രവമാലിന്യം കൃത്യമായി സംസ്കരിക്കുന്നുണ്ടോ, വീടും പരിസരവും വൃത്തിയായി പരിപാലിച്ച് ചെടികൾ നട്ടുപിടിപ്പിച്ച് സൗന്ദര്യവൽക്കരിച്ചിട്ടുണ്ടോ ?, കുടിവെള്ള സ്രോതസിന്റെ പരിപാലനം, അടുക്കളത്തോട്ടത്തിന്റെ പരിപാലനം, ടോയ്ലറ്റ് പരിപാലനം, കുളിമുറിയുടെ പരിപാലനം, ഫർണിച്ചറുകളുടെയും പാത്രങ്ങളുടെയും ക്രമീകരണം, വളർത്തു മൃഗങ്ങളുടെ പരിപാലനം തുടങ്ങിയവയുടെ പരിശോധനയാണ് നടന്നിട്ടുള്ളത്.
വാർഡ് 28 ലെ പ്രമീള അർച്ചന ഒന്നാം സമ്മാനവും, വാർഡ് 29 ലെ സാറ അബ്ദുൾ ലത്തീഫ് തക് വ കുറവങ്ങാട് രണ്ടാം സമ്മാനവും, വാർഡ് 22 ലെ പുഷ്പ അരിയിൽ മൂന്നാം സമ്മാനവും കരസ്ഥമാക്കി. ഇവർക്കുള്ള സമ്മാന വിതരണവും നടത്തി.
