കുട്ടിയെ തട്ടിക്കൊണ്ടുപോയ സംഭവം; പ്രതികളെ ചാത്തന്നൂരിലെ വീട്ടിലെത്തിച്ച് തെളിവെടുപ്പ് നടത്തി
കൊല്ലം: കൊല്ലം ഓയൂരിൽ കുട്ടിയെ തട്ടിക്കൊണ്ടുപോയ സംഭവത്തിൽ പ്രതികളെ ചാത്തന്നൂരിലെ വീട്ടിലെത്തിച്ച് തെളിവെടുപ്പ് നടത്തി. പ്രതികളായ പത്മകുമാർ, ഭാര്യ അനിത കുമാരി, മകൾ അനുപമ എന്നിവരെയാണ് വീട്ടിലെത്തിച്ച് തെളിവെടുപ്പ് നടത്തിയത്. ഫോറൻസിക് സംഘവും സംഭവസ്ഥലത്തുണ്ട്.
കുട്ടിയെ തട്ടിക്കൊണ്ടുപോയ ശേഷം രാത്രി താമസിപ്പിച്ചിരുന്നത് ഈ വീട്ടിലാണ്. കുട്ടിയെ തട്ടിക്കൊണ്ടുപോകനുപയോഗിച്ച കാറും വീട്ടുമുറ്റത്തുണ്ട്. കാറിൽ ഫോറൻസിക് ഉദ്യോഗസ്ഥർ വിശദമായ ശാസ്ത്രീയ പരിശോധന നടത്തി. അന്വേഷണ സംഘത്തിന്റെ ചുമതലയുള്ള ക്രൈംബ്രാഞ്ച് ഡിവൈഎസ്പി എം എം ജോസിന്റെ നേതൃത്വത്തിലുള്ള സംഘമാണ് പ്രതികളെ തെളിവെടുപ്പിന് കൊണ്ടുവന്നത്. ശേഷം ഒളിവിൽ താമസിച്ചതുൾപ്പെടെയുള്ള സ്ഥലങ്ങളിലെത്തിച്ചും പരിശോധന നടത്തുമെന്നാണ് വിവരം.
