ഗ്യാസ് കയറ്റി വന്ന ലോറി നിയന്ത്രണം വിട്ട് കടയിലേക്ക് ഇടിച്ചു കയറി; രണ്ട് പേർക്ക് പരിക്കേറ്റു

താനൂർ വട്ടത്താണി വലിയപാടത്ത് ഗ്യാസ് കയറ്റി വന്ന ലോറി നിയന്ത്രണം വിട്ട് തട്ട്കടയിലേക്ക് ഇടിച്ചു കയറി. രണ്ട് പേർക്ക് പരിക്കേറ്റു. ചൊവ്വാഴ്ച പുലർച്ചെ 1.45നാണ് അപകടം. ലോറിയുടെ ടയർ പൊട്ടിയതിനെ തുടർന്ന് നിയന്ത്രണം വിട്ട് റോഡിന് സമീപത്തെ തട്ടുകടയിലേക്ക് ഇടിച്ചു കയറുകയായിരുന്നു. 

അപകടത്തിൽ തട്ടുകട ഉടമ താനൂർ സ്വദേശി ഷരീഫ്, ലോറി ഡ്രൈവർ തെങ്കാശി സ്വദേശി തങ്കസ്വാമി എന്നിവർക്കാണ് പരിക്കേറ്റത്. പരിക്കേറ്റവരെ തിരൂർ ജില്ലാ ആശുപത്രിയിൽ പ്രവേശിപ്പിച്ചു. താനൂർ പൊലീസ്, ഫയർ ഫോഴ്സ്, സന്നദ്ധപ്രവർത്തകർ, പ്രദേശവാസികൾ എന്നിവർ ചേർന്ന് രക്ഷപ്രവർത്തനം നടത്തി.