സി.പി.ഐ.എം. പ്രവർത്തകന്റെ കൊലപാതകം: RSS പ്രവർത്തകർക്കെതിരെ കേസെടുത്തു
കസർഗോഡ്‌: മഞ്ചേശ്വരത്ത് സിപിഐഎം പ്രവര്‍ത്തകനെ കുത്തിക്കൊലപ്പെടുത്തിയ സംഭവത്തില്‍ ഒരു ആര്‍എസ്‌എസ് പ്രവര്‍ത്തകനെതിരെ പോലീസ് കേസെടുത്തു. സോങ്കാല്‍ സ്വദേശി അശ്വിത്തിനെതിരെയാണ് കേസ്. സിദ്ധിഖിനെ കുത്തിയത് അശ്വിത്താണെന്ന് പൊലീസ് പറഞ്ഞു. സംഭവത്തില്‍ പ്രതിഷേധിച്ച്‌ മഞ്ചേശ്വരം താലുക്കില്‍ സിപിഎം ഹര്‍ത്താല്‍ പ്രഖ്യാപിച്ചു. ഉച്ചയക്ക് 12 മണി മുതല്‍ ആണ് ഹര്‍ത്താല്‍.
അശ്വിത്തിനെ കൂടാതെ കൊലചെയ്യാനെത്തിയ ബൈക്കില്‍ മറ്റു രണ്ടുപേര്‍കൂടി ഉണ്ടായിരുന്നു. ഇവര്‍ക്കായുള്ള തെരച്ചില്‍ ഊര്‍ജിതമാക്കി. പ്രതികള്‍ക്കായി കര്‍ണാടകത്തിലും പൊലീസ് തെരച്ചില്‍ നടത്തുന്നുണ്ട്. കൊലപാതകത്തിന് പിന്നില്‍ ആര്‍എസ്‌എസ് ആണെന്ന് സിപിഐഎം ആരോപിച്ചിരുന്നു.
സോങ്കാള്‍ പ്രതാപ് നഗറിലെ അബ്ദുള്‍ സിദ്ദിഖ്(21) ആണ് മരിച്ചത്. അശ്വിത്ത് ഉള്‍പ്പെടെ മോട്ടോര്‍ബൈക്കിലെത്തിയ മൂന്നംഗ കൊലയാളി സംഘമാണ് അബ്ദുള്‍ സിദ്ദിഖിനെ കുത്തിയതെന്നാണ് പൊലീസ് പറയുന്നത്. ഗുരുതരമായി പരിക്കേറ്റ ഉടന്‍ തന്നെ നാട്ടുകാര്‍ ചേര്‍ന്ന് ആശുപത്രിയില്‍ എത്തിച്ചെങ്കിലും രക്ഷിക്കാനായില്ല.
