സംസ്ഥാന ബജറ്റ്: കൊയിലാണ്ടിയ്ക്ക് 10 കോടി അനുവദിച്ചു
കൊയിലാണ്ടി: 2022-23 വർഷത്തേക്കുള്ള സംസ്ഥാന ബജറ്റിൽ കൊയിലാണ്ടി മണ്ഡലത്തിലേക്കായി 4 പദ്ധതികൾക്ക് 10 കോടി രൂപ അനുവദിച്ചതായി കാനത്തിൽ ജമീല എം.എൽ.എ അറിയിച്ചു. കൊയിലാണ്ടി നഗരസഭയിലും പയ്യോളി നഗരസഭയിലും പുതിയ വാതക ശ്മശാനം നിര്‍മ്മിക്കാൻ 2 കോടി വീതം രൂപയും കൊയിലാണ്ടി പോലീസ് സ്റ്റേഷന് പുതിയ കെട്ടിടം നിര്‍മ്മിക്കാൻ 3 കോടിയും പയ്യോളി ഗവ. വൊക്കേഷണല്‍ ഹയര്‍ സെക്കണ്ടറി സ്കൂളിന് പുതിയ കെട്ടിടം നിര്‍മ്മിക്കാൻ 3 കോടിയുമാണ് അനുവദിച്ചത്. ഇത് കൂടാതെ താഴെ പറയുന്ന 16 പ്രവൃത്തികൾക്ക് ബജറ്റിൽ ടോക്കൺ തുകയും അനുവദിച്ചിട്ടുണ്ട്.
- മൂടാടി ഗ്രാപഞ്ചായത്ത് കുടുംബാരോഗ്യ കേന്ദ്രത്തിന് പുതിയ കെട്ടിടം 2.50 കോടി,
- വെളിയന്നൂര്‍ ചെല്ലി സമഗ്ര നെല്‍കൃഷി വികസന പദ്ധതി 20 കോടി,
- ഗുരു ചേമഞ്ചേരി കുഞ്ഞിരാമന്‍ നായര്‍ മെമ്മോറിയല്‍ സൗത്ത് ഇന്ത്യന്‍ കള്‍ച്ചറല്‍ സെന്റര്‍ നിര്‍മ്മാണം 10 കോടി,
- കാട്ടിലപ്പീടിക – കണ്ണങ്കടവ് – കപ്പക്കടവ് റോഡ് നവീകരണം 4 കോടി,
- കൊയിലാണ്ടി നഗരസഭ- വലിയമലയില്‍ വെറ്ററിനറി സര്‍വ്വകലാശാലയുടെ ഉപകേന്ദ്രം സ്ഥാപിക്കല്‍ 3 കോടി,
- കൊയിലാണ്ടി താലൂക്ക് ഹോമിയോ ആശുപത്രി പുതിയ കെട്ടിടം നിര്‍മ്മാണം 2 കോടി,
- പന്തലായനി കോട്ടക്കുന്നില്‍ കാലടി സര്‍വ്വകലാശാലയുടെ ഭാഗമായി ഉന്നതവിദ്യാഭ്യാസ മേഖലയില്‍ മികവിന്റെ കേന്ദ്രം സ്ഥാപിക്കല്‍ 10 കോടി,
- ഗവ.ഗേള്‍സ് ഹയര്‍ സെക്കണ്ടറി സ്കൂള്‍ കൊയിലാണ്ടി പുതിയ കെട്ടിടം നിര്‍മ്മാണം 3.50 കോടി,
- വന്മുഖം -കീഴൂര്‍ റോഡ് നവീകരണം 4 കോടി,
- കാപ്പാട് -തുഷാരഗിരി അടിവാരം റോഡ് നവീകരണം (എസ്.എച്ച്68) 5 കോടി,
- കാപ്പാട് ടൂറിസം കേന്ദ്രം വികസനം 2 കോടി,
- കൊയിലാണ്ടി നെല്ല്യാടി പുഴയോരം ടൂറിസം പദ്ധതി 2 കോടി,
- കാപ്പാട്-കോട്ടയ്ക്കല്‍- ഇരിങ്ങള്‍ തീരദേശ ടൂറിസം കോറിഡോര്‍ പദ്ധതി 10 കോടി,
- കൊയിലാണ്ടി ഫയര്‍ സ്റ്റേഷന് പുതിയ കെട്ടിടം 5 കോടി,
കീഴൂര്‍ ഗവ.യു. പി സ്കൂള്‍ പുതിയ കെട്ടിടം നിര്‍മ്മാണം 3 കോടി എന്നീ പദ്ധതികളാണ് ബജറ്റിൽ പരിഗണിച്ചത്. ഇതിൽ 10 കോടി അനുവദിച്ച ശ്മശാനങ്ങളും, പോലീസ് സ്റ്റേഷൻ കെട്ടിടം ഉൾപ്പെടുന്ന പ്രവൃത്തികളുടെ എസ്റ്റിമേറ്റുകൾ വേഗത്തിൽ തയ്യാറാക്കി ഭരണാനുമതിയടക്കമുള്ള കാര്യങ്ങൾ വേഗത്തിൽ ലഭ്യമാക്കാൻ നടപടികൾ സ്വീകരിക്കുമെന്ന് എം.എൽ.എ അറിയിച്ചു.
