നിപ്പ വൈറസ് മൂലമുണ്ടാകുന്ന പനി വ്യാപിച്ചത് പേരാമ്പ്ര താലൂക്ക് ആശുപത്രിയില്‍ നിന്നെന്ന് സൂചന
കോഴിക്കോട്: നിപ്പ വൈറസ് മൂലമുണ്ടാകുന്ന പനി കോഴിക്കോട് ജില്ലയില്‍ വ്യാപിച്ചത് പേരാമ്പ്ര താലൂക്ക് ആശുപത്രിയില്‍ നിന്നെന്ന് സൂചന.
നിപ്പ മൂലമുള്ള പനി ആദ്യമായി റിപ്പോര്‍ട്ട് ചെയ്തത് പേരാമ്പ്രയിലായിരുന്നു. തുടര്‍ന്ന് ഒരു വീട്ടിലെ മൂന്നുപേര്‍ മരണപ്പെടുകയായിരുന്നു. ഇതിന് പുറമെ, ഇവരെ ചികിത്സിച്ച പേരാമ്ബ്ര താലൂക്ക് ആശുപത്രിയിലെ നഴ്‌സായ ലിനിയും ഇന്ന് വൈറസ് ബാധയെ തുടര്‍ന്ന് മരിച്ചു.
നിപ്പ വൈറസ് ബാധയെ തുടര്‍ന്ന് മരിച്ച ആറുപേരും ആദ്യം ചികിത്സ തേടിയത് പേരാമ്ബ്ര താലൂക്ക് ആശുപത്രിയിലാണെന്നുള്ളത് സംശയത്തിന് ആക്കം കൂട്ടുന്നുണ്ട്.
മലപ്പുറം, കോഴിക്കോട് ജില്ലകളിലായി പനി ബാധിച്ച്‌ മരിച്ച്‌ 10 പേര്‍ക്കും നിപ്പ വൈറസ് ബാധയുണ്ടായിരുന്നതായി ആരോഗ്യ വകുപ്പ് സംശയിക്കുന്നുണ്ട്.
എന്നാല്‍, കോഴിക്കോട് ജില്ലയില്‍ മരിച്ച രണ്ടുപേര്‍ക്ക് മാത്രമാണ് നിപ്പ സ്ഥിരീകരിച്ചത്. മറ്റുള്ളവരുടെ സ്രവം ഉള്‍പ്പെടെയുള്ള സാമ്ബിളുകള്‍ വിദഗ്ധ പരിശോധനയ്ക്കായി പുനെയിലേക്ക് അയച്ചിട്ടുണ്ട്.
