അന്യായമായി കൂട്ട സ്ഥലം മാറ്റം: എൻ.ജി.ഒ യൂണിയൻ പ്രതിഷേധം തുടരുന്നു
കോഴിക്കോട്‌: ജില്ലയിലെ റവന്യൂ വകുപ്പിൽ അന്യായമായി കൂട്ട സ്ഥലം മാറ്റത്തിന്‌ ഉത്തരവിട്ട കലക്ടറുടെ നടപടിയിൽ എൻ.ജി.ഒ യൂണിയൻ പ്രതിഷേധം തുടരുന്നു. സർക്കാർ തീരുമാനത്തിന് വിരുദ്ധമായി നടന്ന സ്ഥലം മാറ്റം റദ്ദ് ചെയ്യണമെന്നും, മാനദണ്ഡം പാലിച്ച് സ്ഥലംമാറ്റ ഉത്തവിറക്കണമെന്നും ആവശ്യപ്പെട്ട്‌ എൻജിഒ യൂണിയൻ നേതൃത്വത്തിൽ ജീവനക്കാർ കലക്ടറേറ്റിൽ ആറാം ദിവസവും പ്രതിഷേധം സംഘടിച്ചു. യൂണിയൻ നേതാക്കളുമായി നടത്തിയ ചർച്ചയിൽ ഉത്തരവ് റദ്ദാക്കാൻ കലക്ടർ തയ്യാറായില്ല.
ശക്തമായ സമരവുമായി മുന്നോട്ട് പോവാൻ ബുധനാഴ്ച ചേർന്ന എൻജിഒ യൂണിയൻ ജില്ലാ കമ്മിറ്റി തീരുമാനിച്ചു. പ്രതിഷേധം യൂണിയൻ ജില്ലാ സെക്രട്ടറി കെ പി രാജേഷ് ഉദ്ഘാടനം ചെയ്തു. സംസ്ഥാന സെക്രട്ടറിയറ്റംഗം, കെ രാജചന്ദ്രൻ, സംസ്ഥാന കമ്മിറ്റി അംഗങ്ങളായ പി പി സന്തോഷ്, പി സത്യൻ, സിന്ധുരാജൻ എന്നിവർ സംസാരിച്ചു. പി സി ഷജീഷ് കുമാർ, അനൂപ് തോമസ്, ട്രഷറർ വി സാഹിർ, കെ രാജേഷ്, ഇ പ്രമോദ്, സി സി സതീശൻ എന്നിവർ നേതൃത്വംനൽകി.
