മദ്യലഹരിയില്‍ ഏറ്റുമുട്ടി ചികില്‍സയിലിരുന്ന ആള്‍ മരിച്ചു
തിരുവനന്തപുരം: അട്ടക്കുളങ്ങര സബ്ജയിലിനു സമീപം മദ്യലഹരിയില്‍ ഏറ്റുമുട്ടിയതിനെ തുടര്‍ന്ന് പരുക്കേറ്റ് മെഡിക്കല് കോളജ് ആശുപത്രിയില്‍ ചികില്‍സയിലിരുന്ന ആള്‍ മരിച്ചു. മര്‍ദിച്ച യുവാവിനെ ഫോര്‍ട്ട് പൊലീസ് അറസ്റ്റ് ചെയ്തു. തെരുവില്‍ ആക്രി സാധനങ്ങള്‍ എടുത്തു വിറ്റുവരുന്ന തമിഴ്നാട് സ്വദേശി മുരുകന് (42)ആണു മരിച്ചത്. ഇയാളോടൊപ്പം ആക്രി സാധനങ്ങള്‍ പെറുക്കി വന്ന ജയന്‍ (40) ആണ് അറസ്റ്റിലായത്. കഴിഞ്ഞ ചൊവ്വാഴ്ച വൈകിട്ടായിരുന്നു ഇരുവരും തമ്മില്‍ ഏറ്റുമുട്ടിയത്.
മുന്‍പു കാലില്‍ ശസ്ത്രക്രിയ നടത്തി കമ്പി ഇട്ടിരുന്ന മുരുകന് ഏറ്റുമുട്ടലില്‍ കാലിനാണു പരുക്കേറ്റത്. അവശനായി റോഡരികില്‍ കിടന്ന മുരുകനെ പൊലീസെത്തി 108 ആംബുലന്‍സില്‍ മെഡിക്കല് കോളജ് ആശുപത്രിയില്‍ എത്തിച്ചുവെങ്കിലും കഴിഞ്ഞ ദിവസം മരിച്ചു. സ്വന്തമായി കിടപ്പാടമില്ലാത്ത ഇരുവരും കടവരാന്തകളിലാണ് അന്തിയുറങ്ങുന്നതെന്നു പൊലീസ് പറഞ്ഞു. എസ്‌ഐ. ഷാജിമോന്റെ നേതൃത്വത്തില്‍ പിടികൂടിയ പ്രതിയെ കോടതി റിമാന്‍ഡ് ചെയ്തു.
