കോഴിക്കോട് കാര്‍ബണ്‍ സന്തുലിത വിദ്യാലയ ജില്ലയാവുന്നു
കോഴിക്കോട്: 2020ഓടെ കോഴിക്കോട് കേരളത്തിലെ ആദ്യ കാര്‍ബണ്‍ ന്യൂട്രല്‍ വിദ്യാലയ ജില്ലയായി കോഴിക്കോട് മാറും. സംസ്ഥാന സര്‍ക്കാറിന്റെ എനര്‍ജി മാനേജ്‌മെന്റ് സെന്റര്‍ (ഇ.എം.സി ) ആരംഭിച്ച സ്മാര്‍ട്ട് എനര്‍ജി പ്രോഗ്രാമിന്റെ (എസ്.ഇ.പി ) ഭാഗമായാണ് ജില്ലയെ കാര്‍ബണ്‍ സന്തുലിത ജില്ലയാക്കി മാറ്റുന്നത്. ഇത് സംബന്ധിച്ച പ്രഖ്യാപനം വിദ്യാഭ്യാസ ഉപഡയറക്ടര്‍ ഇ.കെ.സുരേഷ്‌കുമാര്‍ നടത്തി.
സെന്റ് ജോസഫ്‌സ് ആംഗ്ലോ ഇന്ത്യന്‍ ഗേള്‍സ് സ്‌കൂള്‍ ഓഡിറ്റോറിയത്തില്‍ നടന്ന കോഴിക്കോട് വിദ്യാഭ്യാസ ജില്ലാതല സ്‌കൂള്‍ കോ-ഓര്‍ഡിനേറ്റര്‍മാര്‍ക്കുള്ള സെന്‍സിറ്റൈസേഷന്‍ കാമ്ബിലാണ് കോഴിക്കോട് കാര്‍ബണ്‍ സന്തുലിത വിദ്യാലയ ജില്ലയായി മാറുമെന്ന് വിദ്യാഭ്യാസ ഉപ ഡയരക്ടര്‍ പ്രഖ്യാപിച്ചത്. 283 അദ്ധ്യാപകര്‍ ചടങ്ങില്‍ പങ്കെടുത്തു.
കോര്‍പ്പറേഷന്‍ വിദ്യാഭ്യാസ സ്റ്റാന്‍ഡിങ്ങ് കമ്മിറ്റി ചെയര്‍മാന്‍ എം.രാധാകൃഷ്ണന്‍ ചടങ്ങ് ഉദ്ഘാടനം ചെയ്തു. പ്രകൃതിവിഭവങ്ങള്‍ പാഴാക്കാതെ കരുതലോടെയുള്ള ഉപയോഗത്തിലൂടെ കാര്‍ബണ്‍ സന്തുലിതാവസ്ഥ കൈവരിക്കേണ്ടത് അനിവാര്യമാണെന്ന് അദ്ദേഹം പറഞ്ഞു.
ജില്ലാവിദ്യാഭ്യാസ ഓഫീസര്‍ മിനി.വി.പി. അദ്ധ്യക്ഷത വഹിച്ചു. ഉപജില്ലാ കോ-ഓര്‍ഡിനേറ്റര്‍ ഡോ.എന്‍.സിജേഷ് സ്വാഗതവും ജോയന്റ് കോ-ഓര്‍ഡിനേറ്റര്‍ അഞ്ജു മോഹന്‍ദാസ് നന്ദിയും പറഞ്ഞു. തോടന്നൂര്‍ എ.ഇ.ഒ. പ്രദീപ്കുമാര്‍, സജീവ്കുമാര്‍.എം.കെ., ഡോ.എന്‍.സിജേഷ് എന്നിവര്‍ വിഷയാവതരണം നടത്തി. പങ്കെടുത്ത എല്ലാ അദ്ധ്യാപകര്‍ക്കും എല്‍.ഇ.ഡി. ബള്‍ബും പല്ലോട്ടിഹില്‍ പബ്ലിക് സ്‌കൂളിലെ വിദ്യാര്‍ത്ഥികള്‍ നിര്‍മ്മിച്ച വിത്തുപേനയും വിതരണം ചെയ്തു. വരും മാസങ്ങളില്‍ കുട്ടികള്‍ക്കായി കാര്‍ട്ടൂണ്‍, ഉപന്യാസരചന, ക്വിസ് മത്സരം, ഊര്‍ജ്ജചാമ്ബ്യന്‍ എന്നിവയടങ്ങിയ ഊര്‍ജ്ജോത്സവം നടക്കും.
ജെ.ആര്‍.സി.,സ്‌കൗട്ട്‌സ് ആന്‍ഡ് ഗൈഡ്‌സ്,എസ്.പി.സി.,ദേശീയഹരിതസേന,ഇതര സ്‌കൂള്‍ ക്ലബ്ബുകള്‍ എന്നിവയുടെയും പി.ടി.എ. യുടെയും സഹകരണത്തോടെ കാര്‍ബണ്‍ ന്യൂട്രല്‍ സ്‌കൂളിനായി സമിതികള്‍ രൂപീകരിക്കും. തുടര്‍ന്ന് മൊബൈല്‍ ആപ്ലിക്കേഷന്റെ സഹായത്തോടെ കാര്‍ബണ്‍ നില തിട്ടപ്പെടുത്തും പിന്നീട് ഊര്‍ജ്ജസംരക്ഷണം, ജലസംരക്ഷണം, ഭക്ഷണം പാഴാക്കാതിരിക്കല്‍, മാലിന്യ സംസ്‌കരണ പരിപാടികള്‍, പ്ലാസ്റ്റിക് ഉപയോഗം കുറയ്ക്കല്‍ എന്നീ മാര്‍ഗ്ഗങ്ങളിലൂടെ കാര്‍ബണിന്റെ ആധിക്യം തടയുകയും വിദ്യാലയ വൃക്ഷവത്കരണത്തിലൂടെ അന്തരീക്ഷത്തില്‍ ഓക്‌സിജന്റെ അളവ് കൂട്ടുകയും ചെയ്യും.
