വെള്ളത്തില് കുടുങ്ങിയ ആംബുലന്സിന് വഴികാട്ടിയായ ബാലന് ധീരതയ്ക്കുള്ള പുരസ്ക്കാരം
വെള്ളത്തില് കുടുങ്ങിയ ആംബുലന്സിന് വഴികാട്ടിയായ ബാലന് ധീരതയ്ക്കുള്ള പുരസ്ക്കാരം. കൃഷ്ണ നദി കരകവിഞ്ഞൊഴുകിയപ്പോള് വെള്ളം കാരണം വഴിയറിയാതെ കുടുങ്ങിയ ആംബുലന്സിന് വഴികാട്ടിയായ വെങ്കിടേഷ് എന്ന ആറാം ക്ലാസുകാരനെ തേടിയാണ് കര്ണാടക സര്ക്കാരിന്റെ ധീരതയ്ക്കുള്ള പുരസ്ക്കാരമെത്തിയത്.
കൃഷ്ണ നദി കരകവിഞ്ഞൊഴുകിയപ്പോള് പ്രദേശമെല്ലാം വെള്ളത്തിനടിയിലായിരുന്നു. ഈ സമയം ദേവദുര്ഗ യാഡ്ഗിര് വഴി വന്ന ആംബുലന്സ് ഡ്രൈവര് വഴിയറിയാതെ കുടുങ്ങിപ്പോയി. പെട്ടന്നാണ് ഡ്രൈവര്ക്ക് സഹായമായി ബാലന് ആംബുലന്സിന് മുന്പിലൂടെ ഓടി വഴികാട്ടിയത്.
അരയൊപ്പം വെള്ളത്തില് കൂടി ഓടുന്നതിനിടെ നിരവധി തവണ നിലത്ത് വീണെങ്കിലും വീണ്ടുമെഴുന്നേറ്റ് വെങ്കിടേഷ് ഓടുകയായിരുന്നു. ഓടിയെത്തിയ വെങ്കിടേഷിന് കൈ നല്കിയാണ് കരയ്ക്ക് കയറ്റിയത്. സമീപം നിന്നവരിലൊരാള് പകര്ത്തിയ ദൃശ്യങ്ങള് വ്യാപകമായി പ്രചരിച്ചിരുന്നു. വ്യാഴാഴ്ച്ച റെയ്ച്ചൂരില് നടന്ന സ്വാതന്ത്രദിനാഘോഷത്തിനിടെ ഡെപ്യൂട്ടി കമ്മീഷണര് ബി. ശരത്താണ് വെങ്കിടേഷിന് പുരസ്ക്കാരം നല്കിയത്.