ബസില് നിന്ന് അമ്മയും മകളും തെറിച്ചു വീണ് വീട്ടമ്മയ്ക്ക് ദാരുണാന്ത്യം
രാമപുരം: തൊടുപുഴയില് നിന്നും നീറന്താനം വഴി പാലായ്ക്ക് സര്വ്വീസ് നടത്തി വരുന്ന സ്വകാര്യ ബസിന്റെ ഡോറില് കൂടി തെറിച്ചുവീണ നീറന്താനം ഇരുന്പുകുഴി കവലയ്ക്ക് സമീപം ഒഴുകയില് ഒ.റ്റി സാറിന്റെ ഭാര്യ മേരി (70) മരിച്ചു. ഇന്ന് രാവിലെ 8.20നാണ് സംഭവം. പാലായ്ക്ക് പോവുകയായിരുന്ന ശ്രാവണ് ബസില് വല്യവീട്ടില് പാലത്തിന് സമീപത്തെ സ്റ്റോപ്പില് നിന്നും മേരിയും മകള് ആഗ്നസും കയറി.
ബസ് സമീപത്തെ ഇരുമ്പുകുഴി കവലയിലെ വളവ് തിരിഞ്ഞപ്പോള് ഡോര് വഴി ഇരുവരും തെറിച്ച് വീഴുകയായിരുന്നു. ടാര് റോഡിലേക്ക് തലയടിച്ച് വീണ് ഗുരുതര പരിക്കുപറ്റിയ മേരിയെ കോട്ടയം മെഡിക്കല് കോളേജില് എത്തിച്ചെങ്കിലും ജീവന് രക്ഷിക്കാനായില്ല. അഗ്നസ്സ് സമീപത്ത് പാര്ക്ക് ചെയ്തിരുന്ന ബൈക്കിലേക്ക് വീണതിനാല് പരിക്ക് ഗുരുതരമല്ല. ആഗ്നസ്സ് പ്രവിത്താനത്തെ സ്വകാര്യ ആശുപത്രിയിലാണ്. ബസ്സിന്റെ ഡോര് തുറന്നു കിടന്നതാണ് അപകട കാരണമെന്ന് യാത്രക്കാര് പറഞ്ഞു.