ബിന്ദു പദ്മനാഭന്‍റെ തിരോധാനം; സെബാസ്റ്റ്യന് 24ന് ഹാജരാകാന്‍ നോട്ടീസ്
ചേര്‍ത്തല: കടക്കരപ്പള്ളി സ്വദേശിനിയുടെ തിരോധാനവുമായി ബന്ധപ്പെട്ട് പള്ളിപ്പുറം സ്വദേശി സെബാസ്റ്റ്യന് 24ന് ഹാജരാകാന്‍ കാണിച്ച്‌ നോട്ടീസ്. കടക്കരപ്പള്ളി സ്വദേശിനി ബിന്ദു പത്മനാഭന്‍റെ തിരോധാനവുമായി ബന്ധപ്പെട്ട് ചോദ്യം ചെയ്യലിനു ഹാജരാകാന്‍ കാണിച്ചാണ് അന്വേഷണ ഉദ്യോഗസ്ഥന്‍ നോട്ടീസ് നല്‍കിയിട്ടുള്ളത്. വസ്തു തട്ടിപ്പ് കേസില്‍ റിമാന്‍ഡിലായിരുന്ന സെബാസ്റ്റ്യന് ജാമ്യത്തിലിറങ്ങിയ ശേഷം തിരോധാനം അന്വേഷിക്കുന്ന സംഘം ചോദ്യം ചെയ്യാന്‍ നോട്ടീസ് നല്‍കിയിരുന്നു.
എന്നാല്‍ ഹാജാരാകാതെ ജില്ലാകോടതിയില്‍ മുന്‍കൂര്‍ ജാമ്യത്തിന് അപേക്ഷിച്ചെങ്കിലും കഴിഞ്ഞദിവസം കോടതി നിരസിച്ചു. തുടര്‍ന്നാണ് 24ന് ചോദ്യംചെയ്യലിന് ഹാജരാകാന്‍ അന്വേഷണ ഉദ്യോഗസ്ഥനായ ആലപ്പുഴ നര്‍ക്കോട്ടിക് സെല്‍ ഡിവൈഎസ്പി നോട്ടീസ് നല്‍കിയിരിക്കുന്നത്. പ്രളയകാലത്ത് പോലീസ് സേനയെ രക്ഷാപ്രവര്‍ത്തനത്തിനും ദുരിതാശ്വാസത്തിനും നിയോഗിച്ചതിനാല്‍ അന്വേഷണം കാര്യമായി നടത്താനായിരുന്നില്ല.
അന്വേഷണം ഉൗര്‍ജിതമാക്കുന്നതിന്‍റെ ഭാഗമായാണ് ചോദ്യം ചെയ്യല്‍ ഉള്‍പ്പെടെ തുടര്‍ നടപടികള്‍. ബിന്ദുവിന്‍റെ സഹോദരന്‍ നല്കിയ പരാതിയിലെ അന്വേഷണത്തിലാണ് ബിന്ദുവിന്‍റെ പേരിലുള്ള വസ്തു തട്ടിയെടുക്കല്‍, വ്യാജരേഖ ചമയ്ക്കല്‍ ഉള്‍പ്പെടെ കേസുകള്‍ സെബാസ്റ്റ്യനെതിരേ ചുമത്തിയത്. ഈ കേസുകളിലെല്ലാം ജാമ്യത്തിലുമാണ് സെബാസ്റ്റ്യന്.
