കേരളത്തിന്റെ പുനര്‍ നിര്‍മാണത്തിനായി അമേരിക്കന്‍ മലയാളികള്‍ നിക്ഷേപം നടത്താന്‍ തയ്യാറാകണം: മുഖ്യമന്ത്രി
ന്യുയോര്‍ക്ക്: പ്രളയം കനത്ത നാശം വിതച്ച കേരളത്തിന്റെ പുനര്‍ നിര്‍മാണത്തിന് ഗ്ലോബല്‍ സാലറി ചലഞ്ചിന് ഏവരും തയ്യാറാകണമെന്ന് മുഖ്യമന്ത്രി പിണറായി വിജയന്‍. ചികിത്സയ്ക്കായി അമേരിക്കയിലെത്തിയ മുഖ്യമന്ത്രി അവിടത്തെ മലയാളി സമൂഹത്തെ അഭിസംബോധന ചെയ്താണ്‌ സഹായം അഭ്യര്‍ത്ഥിച്ചത്‌.
കേരളത്തിന്റെ അതിജീവനത്തിന് ഏവരും സഹകരിക്കണമെന്നും എല്ലാവരും സഹകരിച്ചാലെ നവകേരളത്തെ പടുത്തുയര്‍ത്താന്‍ കഴിയൂവെന്നും മുഖ്യമന്ത്രി പറഞ്ഞു. ഗ്ലോബല്‍ സാലറി ചലഞ്ചിലുടെ 150 കോടിരൂപയാണ്‌ അമേരിക്കന്‍ മലയാളികളുടെ സംഭാവനയായി പ്രതീക്ഷിക്കുന്നത്‌. അത്‌ എവിടെ നിന്നെല്ലാം കണ്ടെത്തണമെന്ന്‌ മലയാളി കൂട്ടായ്‌മകള്‍ക്ക്‌ തീരുമാനിക്കാമെന്നും മുഖ്യമന്ത്രി പറഞ്ഞു.
ഇന്ത്യന്‍ സമയം രാവിലെ അഞ്ചിനാണ്‌ മുഖ്യമന്ത്രി അമേരിക്കന്‍ മലയാളി സമൂഹത്തെ അഭിസംബോധന ചെയ്തത്. ക്രൗഡ് ഫണ്ടിംഗ് അനിവാര്യമാണെന്ന് ചൂണ്ടികാട്ടിയ പിണറായി നാശനഷ്ടങ്ങള്‍ കണക്കാക്കി പുനര്‍നിര്‍മ്മാണം ഉണ്ടാകുമെന്നും വ്യക്തമാക്കി. അമേരിക്കന്‍ മലയാളികള്‍ കേരളത്തില്‍ നിക്ഷേപം നടത്താന്‍ തയ്യാറാകണം. ഏതെങ്കിലും പുനര്‍നിര്‍മ്മാണ പദ്ധതികള്‍ ഏറ്റെടുക്കാനും തയ്യാറാകണം.
ദേശീയ ദുരന്തനിവാരണ മാനദണ്ഡപ്രകാരംകിട്ടുന്ന പണം പുനരുദ്ധാരണത്തിന് മതിയാകില്ലെന്നും അദ്ദേഹം പറഞ്ഞു. ഒരുമാസത്തെ ശമ്ബളം കൊടുക്കാന്‍ തയ്യാറുള്ളവരെല്ലാം ഗ്ലോബല്‍സാലറി ചലഞ്ചില്‍ പങ്കെടുക്കണം. രാജ്യാന്തര തലത്തില്‍ പണം സമാഹരിക്കാനായി മൂന്ന് മാസത്തിനകം ധനദാതാക്കളുടെ സമ്മേളനം വിളിച്ചു ചേര്‍ക്കും. സഹായം ശേഖരിക്കുന്നതിനായി ധനമന്ത്രി തോമസ്‌ ഐസകിനെ അമേരിക്കയിലേക്ക്‌ അയക്കുമെന്നും മുഖ്യമന്ത്രി പറഞ്ഞു.
ചികിത്സയ്ക്ക് ശേഷമുള്ള മുഖ്യമന്ത്രിയുടെ ആദ്യ പൊതു പരിപാടി കൂടിയായിരുന്നു റോക്ക് ലാന്‍റ് കൗണ്ടിയില്‍ നടന്നത്.
