ഏഷ്യന്‍ എച്ച്‌.ആര്‍.ഡി പുരസ്കാരത്തിന് മലയാളിവനിത അര്‍ഹയായി
കോഴിക്കോട്: ഏഷ്യന്‍ രാജ്യങ്ങളിലെ മികച്ച മനുഷ്യവിഭവശേഷി വിഭാഗം മേധാവികള്‍ക്ക് ഏര്‍പ്പെടുത്തിയ ‘ഏഷ്യ എച്ച്‌.ആര്‍.ഡി’ പുരസ്കാരത്തിന് മലയാളിവനിത അര്‍ഹയായി. കോഴിക്കോട് തിരുവണ്ണൂര്‍ സ്വദേശിനിയും അന്താരാഷ്ട്ര ബാങ്കിങ് സ്ഥാപനമായ ക്രെഡിറ്റ് സൂയിസിന്റെ എച്ച്‌.ആര്‍. ഡയറക്ടറുമായ ജ്യോതിമേനോനാണ് പുരസ്കാരം.
‘എച്ച്‌.ആര്‍. സമൂഹത്തിനുള്ള സംഭാവന’ എന്ന വിഭാഗത്തിലാണ് ജ്യോതിമേനോന്റെ പ്രവര്‍ത്തനം അംഗീകരിക്കപ്പെട്ടത്. ഈ വിഭാഗത്തില്‍ ഇന്ത്യയില്‍നിന്ന് അവാര്‍ഡ് നേടിയ ഏക വ്യക്തിയാണ് ഇവര്‍. ജീവനക്കാരിലെ വൈവിധ്യങ്ങളായ കഴിവുകള്‍ കണ്ടെത്തി അവ തൊഴില്‍മേഖലയുടെ വളര്‍ച്ചയ്ക്ക് സഹായിക്കുന്ന വിധത്തില്‍ ഉപയോഗിച്ചെന്നതാണ് ഇവരെ അവാര്‍ഡിനര്‍ഹയാക്കിയ ഘടകം. ബഹ്റൈന്‍ രാജകുടുംബാംഗമായ മുന്‍ മന്ത്രി ഫഹ്മി ബിന്‍ അലി അല്‍ ജൗദര്‍ ചെയര്‍മാനായ കമ്മിറ്റിയാണ് കഴിഞ്ഞ പതിനാല് വര്‍ഷമായി അവാര്‍ഡ് നിര്‍ണയിക്കുന്നത്.
മലേഷ്യ, ഇന്‍ഡൊനീഷ്യ, സിങ്കപ്പൂര്‍ എന്നിവിടങ്ങളില്‍നിന്നുള്ള വിവിധവിഭാഗം മേധാവികളാണ് മറ്റ് കമ്മിറ്റിയംഗങ്ങള്‍. മലേഷ്യയിലെ പുത്രജയയില്‍ നടന്ന ചടങ്ങില്‍ ഉപപ്രധാനമന്ത്രി അഹ്മദ് സാഹിദ് ഹമീദി അവാര്‍ഡ് സമ്മാനിച്ചു. എയര്‍ ഇന്ത്യ റിട്ട. ജനറല്‍ മാനേജര്‍ കെ.ആര്‍. രാമചന്ദ്രന്റെയും വനജയുടെയും മകളാണ് ജ്യോതിമേനോന്‍.
