പി കെ ശങ്കരൻ സ്മാരക മന്ദിരം 26ന് മുഖ്യമന്ത്രി ഉദ്ഘാടനം ചെയ്യും
കൊയിലാണ്ടി: സിപിഐ(എം) നടേരി ലോക്കല്‍ കമ്മിറ്റി ഓഫീസിനായി പുതുതായി നിർമ്മിച്ച കെട്ടിടം 26ന് മുഖ്യമന്ത്രി പിണറായി വിജയൻ ഉദ്ഘാടനം ചെയ്യും. മുതിർന്ന സിപിഐ(എം) നേതാവായിരുന്ന പി കെ ശങ്കരന്റെ ഓർമയ്‌ക്കായി കാവുംവട്ടത്താണ് സ്മാരക മന്ദിരം ഒരുക്കിയത്‌. 26ന് വൈകിട്ട് 3.30നാണ് ഉദ്ഘാടന പരിപാടി. ജില്ലാ കമ്മിറ്റി അംഗവും ദീര്‍ഘകാലം കൊയിലാണ്ടി ഏരിയാ സെക്രട്ടറിയുമായിരുന്ന പി കെ ശങ്കരൻ കർഷകസംഘത്തിന്റെ ജില്ലയിലെ നേതാക്കളിലൊരാളുമായിരുന്നു.
നിരവധി സമരങ്ങളില്‍ പങ്കെടുത്ത് ജയില്‍വാസവും അനുഷ്ഠിച്ചിട്ടുണ്ട്‌. അദ്ദേഹത്തിന്റെ ഓർമ എക്കാലവും നിലനിർത്തുന്ന രീതിയിലാണ് സിപിഐ എം വാങ്ങിച്ച അഞ്ചര സെന്റ്‌ സ്ഥലത്ത് മന്ദിരം പണിതത്. പ്രദേശത്തെ പാർടി നേതാവായിരുന്ന പി കെ ദാമോദരക്കുറുപ്പിന്റെ ഓർമയ്‌ക്കായുള്ള ഹാൾ ഉദ്ഘാടനവും നടക്കും. യു കെ കുഞ്ഞിച്ചോയി, എൻ എസ് നമ്പൂതിരി, കെ കുഞ്ഞാത്തു എന്നിവരുടെ ഫോട്ടോകൾ അനാച്ഛാദനം ചെയ്യും.
