പയ്യോളി ഹയര്‍സെക്കണ്ടറി സ്കൂളിന് പുതിയ കെട്ടിടം: 3 കോടി രൂപയുടെ ഭരണാനുമതിയായി
പയ്യോളിക്ക് എം.എല്‍.എ യുടെ ഓണ സമ്മാനം.. പയ്യോളി ഹയര്‍സെക്കണ്ടറി സ്കൂളിന് പുതിയ കെട്ടിടം നിർമ്മിക്കാനായി 3 കോടി രൂപയുടെ ഭരണാനുമതി ലഭിച്ചതായി എം.എൽ.എ കാനത്തിൽ ജമീല അറിയിച്ചു. മണ്ഡലത്തില്‍ ഏറ്റവുമധികം വിദ്യാര്‍ത്ഥികള്‍ പഠിക്കുന്ന വിദ്യാലയങ്ങളിലൊന്നാണ് പയ്യോളി ഗവ. ഹയര്‍സെക്കണ്ടറി സ്കൂൾ. 2022 – 23 വര്‍ഷത്തെ സംസ്ഥാന ബജറ്റില്‍ പുതിയ കെട്ടിടത്തിന് 3 കോടി രൂപ അനുവദിച്ചിരുന്നു. അതിന്‍റെ തുടര്‍ നടപടികളുടെ ഭാഗമായാണ് ഇപ്പോള്‍ ഭരണാനുമതിയായിരിക്കുന്നത്.
.
.
കെട്ടിടത്തിന്‍റെ സ്ട്രക്ച്ചറല്‍ ഡ്രോയിംഗും ഡിസൈനും പൂര്‍ത്തിയാകുന്ന മുറയ്ക്ക് എസ്റ്റിമേറ്റ് തയ്യാറാക്കി സമര്‍പ്പിക്കും. തുടര്‍ന്ന് സാങ്കേതിക അനുമതികൂടി ലഭിക്കുന്നതോടെ പ്രവര്‍ത്തി ആരംഭിക്കാനാവും. പയ്യോളി ഹയര്‍സെക്കണ്ടറി സ്കൂളില്‍ അടിസ്ഥാന സൗകര്യ വികസനത്തില്‍ വലിയ മുന്നേറ്റമാണ് കഴിഞ്ഞ നാളുകളിലുണ്ടായത്. കിഫ്ബി മുഖേനെ 2 കോടി രൂപ ചിലവഴിച്ച് നിര്‍മ്മിച്ച കെട്ടിടത്തിന്‍റെയും വിദ്യഭ്യാസ വകുപ്പിന്‍റെ പ്ലാന്‍ ഫണ്ടില്‍ നിന്നും 81.17 ലക്ഷം രൂപ ചിലവഴിച്ച് നിര്‍മ്മിച്ച വി.എച്ച്.എസ്.സി കെട്ടിടത്തിന്‍റെയും ഉദ്ഘാടനം കഴിഞ്ഞ നാളുകളിലാണ് നിര്‍വ്വഹിച്ചത്.
.
.
വിദ്യാഭ്യാസ വകുപ്പ് പ്ലാന്‍ ഫണ്ടില്‍ നിന്നും 1 കോടി രൂപ അനുവദിച്ച കെട്ടിടത്തിന്‍റെ പ്രവൃത്തിയും നടന്നുവരികയാണ്. അതിനോടൊപ്പമാണ് പുതിയ കെട്ടിടത്തിന് 3 കോടി രൂപ കൂടി അനുവദിച്ചത്.
