അജൈവ മാലിന്യ ശേഖരണത്തിനായി കൊയിലാണ്ടി നഗരസഭ ഹരിത കർമ്മ സേനക്ക് ഇനി ഇ- ഓട്ടോകളും
കൊയിലാണ്ടി നഗരസഭയില്‍ അജൈവ മാലിന്യ ശേഖരണത്തിനായി ഹരിത കർമ്മ സേനയ്ക്ക് ഇനി ഇ- ഓട്ടോകളും. നഗരസഭയുടെ 2023 -24 വാർഷിക പദ്ധതിയിൽ ഉൾപ്പെടുത്തിയാണ് വാർഡുകളിൽ നിന്നും അജൈവ മാലിന്യ ശേഖരണത്തിനായി പ്രത്യേകം തയ്യാറാക്കിയ ഇ – ഓട്ടോകള്‍ നിരത്തിലിറങ്ങുന്നത്. അഞ്ച് ഇ- ഓട്ടോറിക്ഷകളുടെയും താക്കോൽ നഗരസഭ ചെയർപേഴ്സൺ കെ. പി സുധ ഏറ്റുവാങ്ങി.
അമ്പത് ലക്ഷം രൂപ നഗര സഞ്ചിക ഫണ്ടിൽ (Urban Agglomeration Fund) നിന്നും കേന്ദ്ര സർക്കാറിൻ്റെ ജെം (GEM Portal) പോർട്ടലിൽ ബുക്ക് ചെയ്താണ് അജൈവ മാലിന്യനീക്കത്തിന് പ്രത്യേക രൂപകൽപ്പന ചെയ്ത ഇ-ഓട്ടോകൾ എത്തിച്ചത്. ഇതിനായി ഹരിതകർമ്മ സേനയുടെ പത്ത് പേർക്ക് ഇതിനകം ഡ്രൈവിംഗ് പരിശീലനം പൂർത്തിയായി വരുന്നു.
ചടങ്ങിൽ വൈസ് ചെയർമാൻ അഡ്വ. കെ സത്യൻ, സ്ഥിരം സമിതി അധ്യക്ഷന്മാരായ കെ ഷിജു, ഇ കെ അജിത്ത്, ഡി പി സി അംഗം സുധാകരൻ, മുൻസിപ്പൽ സെക്രട്ടറി ഇന്ദു എസ് ശങ്കരി, എഞ്ചിനിയർ ശിവപ്രസാദ്, ക്ലീൻസിറ്റി മാനേജർ സതീഷ്, ആരോഗ്യ വിഭാഗം ഉദ്യോഗസ്ഥരായ റിഷാദ്, ജമീഷ്, ലിജോയ്, സീന, കുടുംബശ്രീ മെമ്പർ സെക്രട്ടറി രമിത, സി ഡി എസ് ചെയർപേഴ്സൺ ഇന്ദുലേഖ, ഹരിത കർമ്മ സേനാംഗങ്ങൾ തുടങ്ങിയവ പങ്കെടുത്തു.
