പക്ഷിപ്പനി സ്ഥിരീകരിച്ച സാഹചര്യത്തില് പൊതു ജനങ്ങള് ജാഗ്രത പാലിക്കണമെന്ന് ആരോഗ്യവകുപ്പ്
തിരുവനന്തപുരം: പക്ഷിപ്പനി സ്ഥിരീകരിച്ച സാഹചര്യത്തില് പൊതു ജനങ്ങള് ജാഗ്രത പാലിക്കണമെന്ന് ആരോഗ്യവകുപ്പ്. കോഴി, താറാവ്, കാട, വാത്ത, ടര്ക്കി, അലങ്കാരപ്പക്ഷികള് തുടങ്ങി എല്ലാ പക്ഷികളെയും ഈ രോഗം ബാധിക്കാം. ഇവയുമായി അടുത്ത് ഇടപഴകുന്നവര് പ്രത്യേകം ശ്രദ്ധിക്കണം.
പക്ഷിപ്പനി ഒരു വൈറസ് രോഗമാണ്. പക്ഷികളില് നിന്നും പക്ഷികളിലേക്കാണ് ഇത് പകരാറുളളത്. എന്നാല് ചില ഘട്ടങ്ങളില് മനുഷ്യരിലേക്കും പകരാന് ഇടയുണ്ട്. മനുഷ്യരിലേക്ക് രോഗംവന്നാല് ഗുരുതരമായേക്കാമെന്നും ആരോഗ്യവകുപ്പ് മുന്നറിയിപ്പു നല്കി.
