ജനറിക് മരുന്നുകളുടെ ഗുണനിലവാരം ഉറപ്പുവരുത്തുക; ഫാർമസിസ്റ്റ്സ് അസോസിയേഷൻ പേരാമ്പ്ര ഏരിയ കൺവെൻഷൻ
പേരാമ്പ്ര: ജനറിക് മരുന്നുകളുടെ ഗുണനിലവാരം ഉറപ്പു വരുത്താൻ സർക്കാർ സംവിധാനം കാര്യക്ഷമമാക്കണമെന്ന് കെ പി പി എ പേരാമ്പ്ര ഏരിയാ കൺവെൻഷൻ ആവശ്യപ്പെട്ടു. കൺവെൻഷൻ ഫാർമസിസ്റ്റ്സ് അസോസിയേഷൻ സംസ്ഥാന സിക്രട്ടറിയേറ്റ് അംഗം ടി. സതീശൻ ഉദ്ഘാടനം ചെയ്തു. റനീഷ് എ.കെ അദ്ധ്യക്ഷത വഹിച്ചു.
സർക്കാരിതര മേഖലയിൽ പലവിധ സബ്സിഡി റീട്ടെയിൽ ചെയ്ത് ഫാർമസികൾ മുഖേന ജനറിക്ക് മരുന്നുകളുടെ വിൽപനയും ഉപഭോഗവും വർദ്ധിച്ചുവരുന്ന സാഹചര്യത്തിൽ ഇത്തരം മരുന്നുകളുടെ ഗുണനിലവാരം ഉറപ്പുവരുത്താത്തത് മൂലം രോഗശമനം അസാധ്യമാകുന്നതും രോഗാതുരത കൂടുന്നതും വിശിഷ്യാ ജീവിതശൈലി രോഗങ്ങൾ ഏറ്റവും കൂടുതലുള്ള കേരളത്തിലെ സവിശേഷ പശ്ചാത്തലത്തിൽ രോഗ ശുശ്രൂഷ മേഖലയിൽ ഒരു ഭീഷണിയായി തീരുന്നുണ്ടെന്ന് കെ പി പി എ ഏരിയാ കൺവെൻഷൻ ആശങ്ക രേഖപ്പെടുത്തി.
ഫാർമസിസ്റ്റുകളുടെ കാലോചിതമായി പുതുക്കിയ മിനിമം വേതനം ഉടൻ പ്രാബല്യത്തിലാക്കുക, സ്വകാര്യ മേഖലയിലെ ഫാർമസിസ്റ്റുകൾക്ക് ഇൻഷ്വറൻസ്/ ക്ഷേമനിധി പരിരക്ഷ ഉറപ്പുവരുത്തുക, അസിസ്റ്റൻഡ് ഫാർമസി കോഴ്സ് നിർത്തലാക്കുക തുടങ്ങിയ ആവശ്യങ്ങളും കൺവെൻഷനിൽ ആവശ്യപ്പെട്ടു. ജില്ലാ ട്രഷറർ എസ്. ഡി. സലീഷ് കുമാർ, സി.സി ഉഷ , ഷോജി. വി എം എന്നിവർ സംസാരിച്ചു. പി.കെ രാജീവൻ ഏരിയാ സിക്രട്ടറി, സി.സി. ഉഷ പ്രസിഡണ്ട്, ട്രഷറർ പ്രേംനാഥ് എന്നിവരെയും ഉൾപ്പടെ ഭാരവാഹികളായി കൺവെൻഷൻ തെരത്തെടുത്തു. പി.കെ രാജീവൻ സ്വാഗതം പറഞ്ഞു.
