ദേവിക കാല് കൊണ്ടെഴുതിയെടുത്തത് ഫുള്‍ എ പ്ലസ്
വള്ളിക്കുന്ന്: രണ്ടു കൈകളുമില്ലെങ്കിലും ദേവിക പരീക്ഷയെഴുതി, അധികമനുവദിച്ച സമയം ഉപയോഗിക്കാതെ മറ്റുള്ളവര്‍ എഴുതിത്തീര്‍ത്ത അതേ സമയത്ത് ഉത്തരക്കടലാസ് കെട്ടിക്കൊടുത്തു. പരീക്ഷാഫലം വന്നപ്പോള്‍ എല്ലാ വിഷയത്തിലും എ പ്ലസ്. കാലുകളുപയോഗിച്ച്‌ പരീക്ഷയെഴുതിയാണ് മികച്ച വിജയം ഈ മിടുക്കി നേടിയത്.
പഠനത്തില്‍ മാത്രമല്ല കലയിലും പാട്ടിലും ഒന്നാം സ്ഥാനക്കാരിയാണ് ദേവിക. ചിത്രം വരച്ചും പാട്ടു പാടിയും ദേവിക നിരവധി പുരസ്കാരങ്ങള്‍ നേടിയിട്ടുണ്ട്. ജന്മനാ തന്നെ ഇരുകൈകളുമില്ലാത്ത ദേവിക കാലുകൊണ്ടെഴുതിയാണ് പഠിച്ചത്. സഹായിയെ വച്ച്‌ പരീക്ഷ എഴുതാന്‍ അര്‍ഹതയുണ്ടായിട്ടും അതുപയോഗിക്കാതെയാണ് മറ്റ് കുട്ടികള്‍ക്കൊപ്പം വള്ളിക്കുന്ന് സിബിഎച്ച്‌എസ് സ്കൂളില് ദേവിക പരീക്ഷ എഴുതിയെഴുതിയത്.
വീട്ടുകാരുടേയും അധ്യാപകരുടേയും പിന്തുണയായിരുന്നു ദേവികയുടെ കരുത്ത്. ഇനി പ്ലസ് വണിന് വള്ളിക്കുന്ന് സിബി ഹയര്‍ സെക്കന്‍ഡറി സ്കൂളില് തന്നെ പഠിക്കണം. ഡിഗ്രിയും പിജിയും ഉന്നത മാര്‍ക്കോടെ വിജയിക്കണം. പിന്നെ സിവില്‍ സര്‍വീസ് നേടണം. ദേവികയുടെ സ്വപ്നങ്ങള്‍ക്കൊപ്പം സിവില്‍ പൊലീസ് ഓഫീസറായ അച്ഛന്‍ സജീവും അമ്മ സുജിതയും എപ്പോഴുമുണ്ട്.
