ഭീമന്‍ പേന നിര്‍മ്മിച്ച്‌ പ്രതിഷേധ കൂട്ടെഴുത്ത് നടത്തി
കോഴിക്കോട്: അക്ഷരവൈരത്തിന്റെയും അസഹിഷ്ണുതയുടെയും ഭൂമിയായി രാജ്യം മാറുന്നതിനെതിരെ ഭീമന്‍ പേന നിര്‍മ്മിച്ച്‌ പ്രതിഷേധ കൂട്ടെഴുത്ത് നടത്തി. ‘മാനവരൊന്ന്’ എന്ന സന്ദേശം ഭീമന്‍ പേനകൊണ്ടെഴുതി കേരള പത്രപ്രവര്‍ത്തക യൂണിയന്‍ സംസ്ഥാന പ്രസിഡന്റ് കമാല്‍ വരദൂര്‍ കൂട്ടെഴുത്ത് ഉദ്ഘാടനം ചെയ്തു.
കാര്‍ട്ടൂണിസ്റ്റ് ദിലീഫിന്റെ നേതൃത്വത്തില്‍ സഹപ്രവര്‍ത്തകരുടെ സഹായത്തോടെയാണ് മുന്നൂറ് കിലോ ഭാരവും ആറര മീറ്റര്‍ നീളവുമുള്ളപേന നിര്‍മ്മിച്ചത്. ഇരുമ്ബ്, പ്ലാസ്റ്റിക്, മരം, റബ്ബര്‍ എന്നിവ ഉപയോഗിച്ച്‌ 15 ദിവസം കൊണ്ടാണ് ദിലീഫും സഹപ്രവര്‍ത്തകരും കൂറ്റന്‍ പേന നിര്‍മ്മിച്ചത്.
പരിപാടിയില്‍ കാര്‍ട്ടൂണിസ്റ്റ് എം. ദിലീഫ് അധ്യക്ഷത വഹിച്ചു. എന്‍.കെ. ഫൈസല്‍ വേങ്ങേരി, സാലിം ജീറോഡ് എന്നിവര്‍ സംസാരിച്ചു. മജീദ് അല്‍ഹിന്ദ് സ്വാഗതവും യാസര്‍ അറഫാത്ത് നന്ദിയും പറഞ്ഞു.
രണ്ട് ദിവസത്തെ കോഴിക്കോട്ടെ പ്രദര്‍ശനത്തിനു ശേഷം മലപ്പുറം, പാലക്കാട്, തൃശൂര്‍ ജില്ലകളിലൂടെ പ്രയാണം നടത്തി എറണാകുളം ഒബ്റോണ്‍ മാളില്‍ പേന ഒരു മാസം പ്രദര്‍ശിപ്പിക്കും.
ഗിന്നസ് ബുക്ക് അധികൃതരുടെ അംഗീകാരത്തോടെ നിര്‍മ്മിച്ച കൂറ്റന്‍ പേന ലോകത്തിലെ ഏറ്റവും വലിയ ബോള്‍ പോയിന്റ് പെന്‍ എന്ന റെക്കോര്‍ഡ് നേടുമെന്ന പ്രതീക്ഷയിലാണെന്ന് കാര്‍ട്ടൂണിസ്റ്റ് ദിലീഫ് പറഞ്ഞു. ഇതിനകം ഏറ്റവും വലിയ ബാഡ്മിന്റണ്‍ റാക്കറ്റും, അബുദാബിയില്‍ വെച്ച്‌ ലോകത്തിലെ ഏറ്റവും വലിയ സൈക്കിളും നിര്‍മ്മിച്ച്‌ ദിലീഫ് ഗിന്നസില്‍ ഇടംപിടിച്ചിട്ടുണ്ട്. 3333 അടി കാന്‍വാസില്‍ മഹാത്മാഗാന്ധിയുടെ ഏറ്റവും വലിയ കാരിക്കേച്ചര്‍ വരച്ച്‌ ലിംക ബുക്ക് ഓഫ് വേള്‍ഡ് റെക്കോര്‍ഡും നേടിയിട്ടുണ്ട്.
