പിന്നില്‍ വിവാഹ പന്തല്‍ കത്തിയമരുന്നു: ഇതൊന്നും ഗൗനിക്കാതെ മുന്നിലുള്ള ഭക്ഷണം അകത്താക്കുകയാണ്..വീഡിയോ കാണാം
വിവാഹ സല്‍ക്കാരത്തിനിടെ പന്തലിന് തീപിടിച്ചാല്‍ എന്തായിരിക്കും അതിഥികളുടെ അവസ്ഥ? ഒന്നുകില്‍ പോയി തീയണക്കാന്‍ ശ്രമിക്കും, അല്ലെങ്കില്‍ തീപടരുന്നതിന് മുന്നെ സ്ഥലത്തുനിന്ന് പുറത്തുകടക്കാന്‍ ശ്രമിക്കും. എന്നാല്‍, മഹാരാഷ്ട്രയിലെ താണെയില്‍ നടന്ന സംഭവത്തിന്‍റെ വിഡിയോ പലരിലും കൗതുകമുണര്‍ത്തുകയാണ്. പിന്നില്‍ വിവാഹ പന്തല്‍ കത്തിയമരുമ്പോഴും രണ്ടുപേര്‍ ഇതൊന്നും ഗൗനിക്കാതെ മുന്നിലുള്ള ഭക്ഷണം അകത്താക്കുകയാണ്. താണെയിലെ ഭിവണ്ടിയില്‍ ഞായറാഴ്ച വൈകീട്ടാണ് സംഭവം. വിവാഹ പന്തല്‍ ഉയരത്തില്‍ കത്തുന്നത് ഭക്ഷണഹാളില്‍നിന്ന് കാണാം. അവിടെയുണ്ടായിരുന്ന ജീവനക്കാര്‍ സംഭവം അന്വേഷിക്കുകയും അങ്ങോട്ട് പോകുന്നതും വൈറല്‍ വിഡിയോയില്‍ ദൃശ്യമാണ്.
എന്നാല്‍, ഇതിലൊന്നും യാതൊരു ആശങ്കയും കാണിക്കാതെ രണ്ടുപേര്‍ തങ്ങളുടെ മുന്നില്‍ വിളമ്ബിയ ഭക്ഷണം ആസ്വദിച്ച്‌ കഴിക്കുകയാണ്. ഒരാള്‍ ഇടക്ക് എണീറ്റ് പിന്നിലേക്ക് നോക്കുന്നുണ്ടെങ്കിലും വീണ്ടും ഭക്ഷണം കഴിക്കല്‍ തുടര്‍ന്നു. മറ്റു ടാബിളുകളില്‍ മിക്കതും കാലിയാണ്. അന്‍സാരി വിവാഹ മണ്ഡപത്തില്‍ പടക്കം പൊട്ടിത്തെറിച്ചാണ് തീപിടിത്തമുണ്ടായത്. സംഭവത്തില്‍ ആറ് ഇരുചക്രവാഹനങ്ങളും കസേരകളും അലങ്കാരവസ്തുക്കളും കത്തിനശിച്ചു. താണെ മുനിസിപ്പല്‍ കോര്‍പ്പറേഷന്‍ അറിയിച്ചതനുസരിച്ച്‌ തീ അണയ്ക്കാന്‍ നാല് ഫയര്‍ എഞ്ചിനുകള്‍ സ്ഥലത്തെത്തി. ഭാഗ്യവശാല്‍ സംഭവത്തില്‍ ആര്‍ക്കും പരിക്കില്ല.
