നിര്‍ഭയ കേസിലെ പ്രതികളുടെ വധശിക്ഷ വെവ്വേറെ നടത്താമെന്ന കേന്ദ്ര സര്‍ക്കാര്‍ നിര്‍ദേശം തള്ളി
ഡല്‍ഹി: നിര്‍ഭയ കേസിലെ പ്രതികളുടെ വധശിക്ഷ വെവ്വേറെ നടത്താമെന്ന കേന്ദ്ര സര്‍ക്കാര്‍ നിര്‍ദേശം തള്ളി ഡല്‍ഹി ഹൈക്കോടതി. പ്രതികളുടെ വധശിക്ഷ ഒരുമിച്ച്‌ നടത്തണമെന്ന് കോടതി ആവശ്യപ്പെട്ടു. വധശിക്ഷ ഒരുമിച്ചു നടത്തണമെന്ന വിചാരണക്കോടതിയുടെ ഉത്തരവ് റദ്ദാക്കാനാവില്ലെന്നും കോടതി പറഞ്ഞു. ഇതോടെ കേസിലെ നാല് പ്രതികളുടേയും ശിക്ഷ വൈകുമെന്ന് ഉറപ്പായി.
ഒരു കുറ്റവാളിയുടെ ദയാ ഹര്‍ജിയില്‍ തീര്‍പ്പു കല്‍പ്പിച്ചില്ലെങ്കില്‍ മറ്റ് കുറ്റവാളികളുടെ വധശിക്ഷ നടപ്പാക്കാമെന്ന് ഡല്‍ഹി ജയില്‍ ചട്ടങ്ങളില്‍ പറയുന്നില്ല. സുപ്രീം കോടതി ശാക്ഷാവിധി ഒരുമിച്ച്‌ പുറപ്പെടുവിച്ചതിനാല്‍ എല്ലാ കുറ്റവാളികളുടെയും മരണ വാറന്‍റ് ഒരുമിച്ച്‌ നടപ്പാക്കണം, പ്രത്യേകം അല്ല- കോടതി പറഞ്ഞു.
ശിക്ഷ വൈകിപ്പിക്കാന്‍ പ്രതികള്‍ മനപൂര്‍വം ശ്രമിക്കുകയാണെന്ന് നിരീക്ഷിച്ച കോടതി ഒരാഴ്ചയ്ക്കകം നിയമ നടപടികള്‍ പൂര്‍ത്തിയാക്കണമെന്ന് പ്രതികള്‍ക്ക് അന്ത്യശാസനം നല്‍കി. പ്രതികള്‍ ഒരാഴ്ചയ്ക്കകം നിയമ നടപടികള്‍ പൂര്‍ത്തിയാക്കണം. ദയാഹര്‍ജിയും തിരുത്തല്‍ ഹര്‍ജിയുമടക്കം ഒരാഴ്ചയ്ക്കകം നല്‍കണം. നാല് പ്രതികളും അതിപൈശാചികമായ കുറ്റകൃത്യം ചെയ്തവരാണ്. ശിക്ഷ നീട്ടിക്കൊണ്ടുപോകാന്‍ അനുവദിക്കില്ലെന്നും കോടതി ചൂണ്ടിക്കാട്ടി.
