‘ഫാനി’ നാളെ പിറക്കും; കനത്ത മഴയ്‌ക്ക്‌ സാധ്യത
തിരുവനന്തപുരം: ചുഴലിക്കാറ്റിന‌് അരങ്ങൊരുക്കി തെക്കന്‍ ബംഗാള്‍ ഉള്‍ക്കടലില്‍ രൂപപ്പെട്ട ന്യൂനമര്‍ദം ശക്തമായി. ഞായറാഴ‌്ചയോടെ ഇത‌് ചുഴലിക്കൊടുങ്കാറ്റായി മാറി വടക്കുപടിഞ്ഞാറ‌് ദിശയില്‍ നീങ്ങും. ആശങ്ക പരത്തി എത്തുന്ന ‘ഫാനി’ ചുഴലിക്കാറ്റ‌് ചൊവ്വാഴ‌്ച പുലര്‍ച്ചെ തമിഴ‌്നാട‌്, ആന്ധ്ര തീരം തൊടുമെന്നാണ‌് കേന്ദ്രകാലാവസ്ഥാ വകുപ്പിന്റെ വിലയിരുത്തല്‍. ഈ മേഖലയില്‍ മണിക്കൂറില്‍ 90 മുതല്‍ 100 കിലോമീറ്റര്‍ വേഗത്തില്‍ കാറ്റടിക്കാനും സാധ്യതയുണ്ട‌്. ചുഴലിക്കാറ്റ‌് കേരളത്തെ നേരിട്ട‌് ബാധിക്കില്ലെങ്കിലും ഞായറാഴ‌്ചമുതല്‍ സംസ്ഥാനത്ത‌് കനത്ത മഴ ലഭിക്കും.
ഇന്ത്യന്‍ മഹാസമുദ്രത്തിന്റെ തെക്ക‌് കിഴക്കും ബംഗാള്‍ ഉള്‍ക്കടലിലുമായി നിലകൊണ്ടിരുന്ന ന്യൂനമര്‍ദം ശക്തിപ്രാപിച്ചുകൊണ്ടിരിക്കുകയാണ‌്. സമുദ്രനിരപ്പിന്റെ താപനില നിലവില്‍ 30–31 ഡിഗ്രി സെല്‍ഷ്യസ‌ാണ‌്. ഇത‌് ചുഴലിക്കാറ്റ‌് രൂപീകരണത്തിന‌് കാരണമാകും. ഞായറാഴ‌്ചയോടെ ചുഴലിക്കാറ്റ‌് തമിഴ‌്നാട‌് തീരം ലക്ഷ്യമാക്കി നീങ്ങുമെന്നാണ‌് പ്രവചനം. തിങ്കളാഴ‌്ച തീവ്രചുഴലിക്കാറ്റായി തീരത്തോട‌് അടുക്കും. ചൊവ്വാഴ‌്ച തീരം തൊടും. വടക്ക‌് ദിശയില്‍ സഞ്ചരിക്കുന്ന ചുഴലിക്കാറ്റ‌് മ്യാന്‍മാര്‍ ലക്ഷ്യമാക്കി നീങ്ങാനും സാധ്യതയുണ്ട‌്.
ശ്രീലങ്കയ‌്ക്ക‌് 1140 കിലോമീറ്റര്‍ കിഴക്ക‌് തെക്കും ചെന്നൈക്ക‌് 1490 കിലോമീറ്റര്‍ തെക്ക‌് കിഴക്കുമായാണ‌് ന്യൂനമര്‍ദം ഇപ്പോള്‍ നിലകൊള്ളുന്നത‌്. ന്യൂനമര്‍ദത്തിന്റെ പ്രഭാവത്തില്‍ കേരളതീരത്ത് ശക്തമായ കാറ്റ് വീശാന്‍ സാധ്യതയുള്ളതിനാല്‍ മത്സ്യത്തൊഴിലാളികള്‍ കടലില്‍ പോകരുതെന്ന‌് മുന്നറിയിപ്പുണ്ട‌്. ആഴക്കടലില്‍ മത്സ്യബന്ധനത്തിലേര്‍പ്പെടുന്നവര്‍ തിരിച്ചെത്തണമെന്ന‌് നിര്‍ദേശിച്ചിട്ടുണ്ട‌്.
തിങ്കളാഴ‌്ച എറണാകുളം, ഇടുക്കി, തൃശൂര്‍, മലപ്പുറം, വയനാട് ജില്ലകളിലും ചൊവ്വാഴ‌്ച കോട്ടയം, എറണാകുളം, ഇടുക്കി, തൃശൂര്‍, പാലക്കാട്, മലപ്പുറം, കോഴിക്കോട്, വയനാട് ജില്ലകളിലും ശക്തമായ മഴ ലഭിക്കും. ഈ ജില്ലകളില്‍ യെല്ലോ അലര്‍ട്ട് പ്രഖ്യാപിച്ചിട്ടുണ്ട‌്.
