പൊലീസ് സ്റ്റേഷനുകളിലെ സി സി ടിവി ക്യാമറകളുടെ പ്രവര്‍ത്തനം നിരീക്ഷിക്കാന്‍ ഔട്ട്സൈഡ് സമിതി
കോട്ടയം: പൊലീസ് സ്റ്റേഷനുകളിലെ മര്‍ദ്ദന വീരന്‍മാര്‍ ജാഗ്രതൈ. പൊലീസ് സ്റ്റേഷനുകളിലെ സി സി ടിവി ക്യാമറകളുടെ പ്രവര്‍ത്തനം നിരീക്ഷിക്കാന്‍ സംസ്ഥാന ജില്ലാ തല ഔട്ട്സൈഡ് സമിതികള്‍ രൂപീകരിച്ചു. ആഭ്യന്തര, ധനകാര്യ സെക്രട്ടറിമാര്‍, ഡി.ജി.പി, വനിതാ കമ്മിഷന്‍ ചെയര്‍പേഴ്സണ്‍ എന്നിവരാണ് സംസ്ഥാനതല ഔട്ട്സൈഡ് കമ്മിറ്റി അംഗങ്ങള്‍, ജില്ലാതല സമിതിയില്‍ കളക്ടര്‍, എസ്. പി, മേയര്‍/ ജില്ലാ പഞ്ചായത്ത് പ്രസിഡന്റ്, ആര്‍.ഡി.ഒ എന്നിവരും അംഗങ്ങളാണ്.
രാജ്യത്തെ എല്ലാ പൊലീസ് സ്റ്റേഷനുകളിലും സി.ബി.ഐ, എന്‍.ഐ.എ, ഇ. ഡി.തുടങ്ങിയ അന്വേഷണ ഏജന്‍സികള്‍ പ്രതികളെ ചോദ്യം ചെയ്യുന്ന ഓഫീസുകളിലും സി.സി ടി.വി ക്യാമറകള്‍ സ്ഥാപിക്കാനാണ് സുപ്രീംകോടതി നിര്‍ദ്ദേശം. ഉത്തരവിന്‍ പ്രകാരം ഏതൊക്കെ പൊലീസ് സ്റ്റേഷനില്‍ എവിടെയൊക്കെ, എത്രയൊക്കെ ക്യാമറകള്‍ സ്ഥാപിച്ചു എന്നറിയിക്കാന്‍ സുപ്രീംകോടതി സംസ്ഥാന സര്‍ക്കാരുകളോടും കേന്ദ്രഭരണ പ്രദേശങ്ങളോടും നിര്‍ദ്ദേശിച്ചിരുന്നു. ഇതേ തുടര്‍ന്നാണ് സമിതി രൂപീകരിച്ച്‌ ആഭ്യന്തരവകുപ്പ് ഉത്തരവായത്.
സ്റ്റേഷന്റെ മുക്കും മൂലയും ക്യാമറ പരിധിയില്‍
സി.സി ടി.വിയുടെ പരിധിയില്‍ വരാത്ത ഒരു ഭാഗവും പൊലീസ് സ്റ്റേഷനില്‍ ഉണ്ടാകരുതെന്ന് സുപ്രീംകോടതി വ്യക്തമാക്കിയിട്ടുണ്ട്. സ്റ്റേഷനകത്തേക്ക് പ്രവേശിക്കുന്ന വഴികളിലും പുറത്തേക്കുള്ള വഴികളിലും ക്യാമറ സ്ഥാപിക്കണം. റിസപ്ഷന്‍, ലോക്കപ്പ്, വരാന്ത, ഇന്‍സ്പെക്ടറുടെ മുറി, ശൗചാലയങ്ങളുടെ പുറംഭാഗം തുടങ്ങിയ ഇടങ്ങളെല്ലാം ക്യാമറ കണ്ണിലായിരിക്കും.
രാത്രി ദൃശ്യം പക‌ര്‍ത്തുന്നതും ശബ്ദം റെക്കോഡ് ചെയ്യാന്‍ കഴിയുന്നതുമായ ക്യാമറകളാണ് സ്ഥാപിക്കേണ്ടത്. ചോദ്യം ചെയ്യുന്ന ഓഫീസുകളില്‍ എവിടെയെങ്കിലും വൈദ്യുതി കണക്ഷനോ, ഇന്റര്‍നെറ്റ് കണക്ഷനോ ഇല്ലെങ്കില്‍ അവ എത്രയും വേഗം ഉറപ്പാക്കണം. ദൃശ്യങ്ങള്‍ 18 മാസം സൂക്ഷിക്കണം.
നാര്‍ക്കോട്ടിക്ക് കണ്‍ട്രോള്‍ ബ്യൂറോ, ഡിപ്പാര്‍ട്ടുമെന്റ് ഓഫ് റവന്യൂ ഇന്റലിജന്‍സ്, സീരിയസ് ഫ്രോഡ് ഇന്‍വെസ്റ്റിഗേഷന്‍ ഓഫീസ് (എസ്.എഫ്.ഐ. ഒ) ഓഫീസുകളിലും ക്യാമറ സ്ഥാപിക്കേണ്ടതുണ്ട്.
