സര്‍വകലാശാലകളില്‍ രാഷ്ട്രീയംനോക്കി തീരുമാനമെടുക്കരുത് – ഗവര്‍ണര്‍
കോട്ടയം: കേരളത്തിലെ 13 സര്‍വകലാശാലകളില്‍ നാലിടത്ത് വൈസ്ചാന്‍സലറുടെ തസ്തിക ഒഴിഞ്ഞുകിടക്കുകയാണെന്ന് ചാന്‍സലര്‍ കൂടിയായ ഗവര്‍ണര്‍ പി.സദാശിവം പറഞ്ഞു. നിയമന നടപടികള്‍ ഹൈക്കോടതി സ്റ്റേ ചെയ്തതാണ് കാരണം. സ്റ്റേ നീക്കാന്‍ എല്ലാ നടപടികളും സ്വീകരിച്ചിട്ടുണ്ടെന്നും അദ്ദേഹം പറഞ്ഞു. എം.ജി.സര്‍വകലാശാലാ ആസ്ഥാനത്ത് ചാന്‍സലേഴ്സ് കൗണ്‍സിലിനുശേഷം പത്രസമ്മേളനത്തില്‍ സംസാരിക്കുകയായിരുന്നു അദ്ദേഹം.
കണ്ണൂര്‍, കേരള കലാമണ്ഡലം, ശ്രീ ശങ്കരാചാര്യ, കേരള വെറ്ററിനറി ആന്‍ഡ് ആനിമല്‍ സയന്‍സസ് സര്‍വകലാശാലകളിലാണ് വൈസ്ചാന്‍സലര്‍ ഒഴിവുള്ളത്. 2010ലെ യു.ജി.സി. ചട്ടങ്ങള്‍ അനുസരിച്ചുമാത്രമേ വി.സി, പി.വി.സി. നിയമനങ്ങള്‍ നടത്തൂവെന്ന് സംസ്ഥാന സര്‍ക്കാര്‍ അറിയിച്ചിട്ടുണ്ടെന്നും സദാശിവം പറഞ്ഞു.
2014 നവംബറിലാണ് വൈസ്ചാന്‍സലര്‍മാരെ ഉള്‍പ്പെടുത്തി ചാന്‍സലേഴ്സ് കൗണ്‍സില്‍ രൂപവല്‍ക്കരിച്ചത്. ഇതിന്റെ പ്രവര്‍ത്തനഫലമായി ഒട്ടേറെ മാറ്റങ്ങളുണ്ടായി. അടുത്തിടെ നടന്ന ദേശീയ റാങ്കിങ്ങില്‍ കേരള, കാലിക്കറ്റ്, എം.ജി., കൊച്ചി ശാസ്ത്രസാങ്കേതിക സര്‍വകലാശാലകള്‍ക്ക് ഉയര്‍ന്ന സ്ഥാനങ്ങള്‍ നേടാനായത് ഗവര്‍ണര്‍ ചൂണ്ടിക്കാട്ടി.
സര്‍വകലാശാലകള്‍ നിശ്ചിത ഇടവേളകളില്‍ തനിക്ക് പ്രവര്‍ത്തന റിപ്പോര്‍ട്ട് അയച്ചുതരും. അവിടങ്ങളില്‍നിന്ന് കിട്ടുന്ന പരാതികളില്‍ നടപടി സ്വീകരിക്കാന്‍ വൈസ്ചാന്‍സലര്‍മാരോട് നിര്‍ദേശിച്ചിട്ടുണ്ട്. സര്‍വകലാശാലയെക്കുറിച്ച്‌ വിവിധ മാധ്യമങ്ങളില്‍ വരുന്ന വാര്‍ത്തകളിലും വൈസ്ചാന്‍സലര്‍മാരോട് വിശദീകരണം തേടാറുണ്ട്.
പഠിച്ചിറങ്ങിയാല്‍ ജോലി കിട്ടുമെന്ന പ്രതീക്ഷ പകരാന്‍ സര്‍വകലാശാലകള്‍ക്ക് കഴിയണമെന്ന് അദ്ദേഹം നിര്‍ദേശിച്ചു. തൊഴില്‍ കൂടി പഠിപ്പിക്കാന്‍ കൂടുതല്‍ നടപടികള്‍ സ്വീകരിക്കണം. കാര്‍ഷിക സര്‍വകലാശാല പോലുള്ളവ കര്‍ഷകരുടെ പ്രശ്നങ്ങള്‍ പരിഹരിക്കാനും നടപടി സ്വീകരിക്കണം. വിദ്യാര്‍ഥികള്‍ക്കിടയില്‍ രക്തദാനം പ്രോത്സാഹിപ്പിക്കണം.
വിദ്യാഭ്യാസമേഖലയില്‍ സംഘര്‍ഷങ്ങളുണ്ടാകാതെ നോക്കണം. തിരുവനന്തപുരം ലോ അക്കാദമിയിലെ സമരം തുടര്‍ന്നപ്പോള്‍ താന്‍ അവിടെനിന്നുള്ള ആറ് വിദ്യാര്‍ഥികളെ രാജ്ഭവനിലേക്ക് വിളിപ്പിച്ചു. അവരുടെ സമരമാര്‍ഗം ശരിയല്ലെന്ന് ഉപദേശിച്ചു. നാല് ദിവസത്തിനുള്ളില്‍ സമരം തീര്‍ന്നെന്നും ഗവര്‍ണര്‍ പറഞ്ഞു.
സര്‍വകലാശാലാ സിന്‍ഡിക്കേറ്റിലും സെനറ്റിലും മറ്റും എത്തിയാല്‍ രാഷ്ട്രീയംനോക്കി തീരുമാനങ്ങളെടുക്കരുതെന്നും അദ്ദേഹം പറഞ്ഞു. തങ്ങള്‍ നടപ്പാക്കിയ കാര്യങ്ങള്‍ വൈസ്ചാന്‍സലര്‍മാര്‍ കൗണ്‍സിലില്‍ അവതരിപ്പിച്ചു. മന്ത്രി പ്രൊഫ. സി.രവീന്ദ്രനാഥ്, എം.ജി.സര്‍വകലാശാലാ വൈസ്ചാന്‍സലര്‍ ഡോ. ബാബു സെബാസ്റ്റ്യന്‍, ഉന്നതവിദ്യാഭ്യാസ സെക്രട്ടറി ഡോ. ഉഷാ ടൈറ്റസ്, ഗവര്‍ണറുടെ സെക്രട്ടറി ദേവേന്ദ്രകുമാര്‍ ദൊഡാവത് എന്നിവരും പത്രസമ്മേളനത്തില്‍ പങ്കെടുത്തു.
