ഫ്ലക്സ് വീണ് യുവതി മരിച്ച സംഭവം: മദ്രാസ് ഹൈക്കോടതി സ്വമേധയാ കേസെടുത്തു
ചെന്നൈ: റോഡരികിലെ ഫ്ലക്സ് വണ്ടിയുടെ പുറത്തേക്ക് വീണ് യുവതി മരിച്ച സംഭവത്തില്‍ തമിഴ്നാട് സര്‍ക്കാരിനെ വിമര്‍ശിച്ച്‌ മദ്രാസ് ഹൈക്കോടതി. സംഭവത്തില്‍ കോടതി സ്വമേധയാ കേസ് എടുത്തു. പോലീസിനോടും കോര്‍പറേഷന്‍ അധികൃതരോടും നേരിട്ട് ഹാജരാകാനും കോടതി ഉത്തരവിട്ടു. സംഭവത്തെ തുടര്‍ന്ന് അണ്ണാ ഡിഎംകെ നേതാവ് ജയഗോപാലിനെതിരെ പോലീസ് കേസെടുത്തിരുന്നു.
ചെന്നൈ സ്വദേശിയായ സോഫ്റ്റ് വെയര്‍ എഞ്ചിനീയര്‍ ശുഭശ്രീ രവി(23) ആണ് അപകടത്തില്‍പ്പെട്ടത്. ജോലി കഴിഞ്ഞ് സ്കൂട്ടറില്‍ വരവേ ഡിവൈഡറില്‍ സ്ഥാപിച്ചിരുന്ന അണ്ണാഡിഎംകെ നേതാവിന്‍റെ മകന്‍റെ വിവാഹ പരസ്യം പതിച്ച ബോര്‍ഡ് മറിഞ്ഞു വീഴുകയായിരുന്നു. ഇതോടെ നിയന്ത്രണം നഷ്ടമായി പിന്നാലെ വന്ന ടാങ്കര്‍ ലോറിക്ക് മുന്നില്‍‌പ്പെടുകയായിരുന്നു. ഉടന്‍ തന്നെ ആശുപത്രിയില്‍ എത്തിച്ചെങ്കിലും ജീവന്‍ രക്ഷിക്കാനായില്ല.
സംഭവവുമായി ബന്ധപ്പെട്ട് ടാങ്കര്‍ ലോറി ഡ്രൈവറെയും അറസ്റ്റ് ചെയ്തിട്ടുണ്ട്. ചെന്നൈയില്‍ റോഡരികില്‍ അനധികൃത ബാനറുകളും പരസ്യബോര്‍ഡുകളും റോഡില്‍ സ്ഥാപിക്കുന്നത് കുറ്റകരമാണ്.
