പ്രളയത്തെ അതിജീവിക്കുന്നതില്‍ പിണറായിയുടെ നേതൃത്വത്തെ പ്രശംസിച്ച്‌ ദി ടെലഗ്രാഫ്‌ ദിനപ്പത്രം
കൊല്‍ക്കൊത്ത: പ്രളയദുരിതം നേരിടുന്നതിന്‌ കേരളത്തെ മുന്നില്‍നിന്നു നയിച്ച മുഖ്യമന്ത്രി പിണറായി വിജയന്‌ പ്രശംസയുമായി ‘ദി ടെലഗ്രാഫ്‌’ പത്രം. കൊല്‍ക്കത്തയില്‍ നിന്ന്‌ പ്രസിദ്ധീകരിക്കുന്ന ഇംഗ്ലീഷ്‌ ദിനപ്പത്രമായ ടെലഗ്രാഫിന്റെ ഇന്നത്തെ ലീഡ്‌ വാര്‍ത്ത ദുരിതാശ്വാസ പ്രവര്‍ത്തനങ്ങള്‍ ഏകോപിപ്പിച്ചതില്‍ മുഖ്യമന്ത്രിയുടെ സാമര്‍ഥ്യത്തെ അഭിനന്ദിച്ചുകൊണ്ടാണ്‌. ”CM, the Crisis Manager” എന്ന തലക്കെട്ടിലാണ്‌ വാര്‍ത്ത.
”ഷട്ടറുകള്‍ ഓരോന്നായി തുറന്നുകൊണ്ടിരുന്നപ്പോഴും ജില്ലകള്‍ ഓരോന്നായി പ്രളയത്തില്‍ മുങ്ങിക്കൊണ്ടിരുന്നപ്പോഴും മലയാളികള്‍ ഉറ്റുനോക്കിയത്‌ ഒരു മുഖത്തേക്കാണ്‌ അവര്‍ കാതോര്‍ത്തത്‌ ഒരു ശബ്ദം കേള്‍ക്കാനാണ്‌. കേരളത്തിലെ ജനങ്ങള്‍ ഏറ്റവുമധികം വിശ്വാസമര്‍പ്പിച്ച ആ മനുഷ്യന്‍ മുഖ്യമന്ത്രിക്കസേരയിലിരിക്കുന്ന പിണറായി വിജയനല്ലാതെ മറ്റാരുമല്ല. ദുരന്തം വാതില്‍ക്കലെത്തുമ്ബോള്‍ മുഖ്യമന്ത്രിക്കസേര അഭയസ്ഥാനമാകുന്ന ഇത്തരമൊരു കാഴ്‌ച രാജ്യത്തധികമില്ല.” – ടെലഗ്രാഫ്‌ വാര്‍ത്തയില്‍ പറയുന്നു.
കേരളത്തിന്റെ അതിജീവനം രാജ്യാന്തരതലത്തില്‍ വാര്‍ത്തയാകുന്നതിനിടെയാണ്‌ അതില്‍ മുഖ്യമന്ത്രി പിണറായി വിജയന്റെ നേതൃത്വത്തെ പ്രശംസിച്ച്‌ ദേശീയ ദിനപ്പത്രവും രംഗത്തെത്തിയിരിക്കുന്നത്‌.
