ദുരൂഹസാഹചര്യത്തില്‍ കാണാതായ വീട്ടമ്മയെയും പെണ്‍മക്കളെയും മൂന്നാഴ്ചക്ക് ശേഷം കണ്ടെത്തി
മലപ്പുറം: ദുരൂഹസാഹചര്യത്തില്‍ കാണാതായ വീട്ടമ്മയെയും മൂന്ന് പെണ്‍മക്കളെയും മൂന്നാഴ്ചക്ക് ശേഷം തിരുവനന്തപുരത്ത് കണ്ടെത്തി. തിരുവനന്തപുരത്ത് നിന്ന് കോഴിക്കോട്ടെത്തിയ ഇവരെ സംബന്ധിച്ച വിവരം സ്നേഹിത പ്രവര്‍ത്തകര്‍ പോലീസിന് കൈമാറുകയായിരുന്നു. കഴിഞ്ഞ ഏപ്രില്‍ 30ന് കരിപ്പൂര്‍ പുളിയം പറമ്ബില്‍ നിന്ന് കാണാതായ വീട്ടമ്മയേയും മൂന്ന് പെണ്‍കുട്ടികളേയുമാണ് കണ്ടെത്തിയത്. പുളിയം പറമ്ബില്‍ താമസിക്കുന്ന പ്രവാസിയുടെ ഭാര്യയേയും 18, ആറ്,നാല് വയസുളള മൂന്ന് പെണ്‍കുട്ടികളുമാണ് കാണാതായത്.
നേരത്തെ പരിചയപ്പെട്ട, തിരുവനന്തപുരം ബീമാപള്ളിക്ക് സമീപമുള്ള സുഹൃത്തിന്റെ ഫ്ളാറ്റിലായിരുന്നു ഇവര്‍ കഴിഞ്ഞതെന്ന് പോലീസ് പറഞ്ഞു. അവിടെ നിന്നും തീവണ്ടിയില്‍ കോഴിക്കോട്ടെത്തിയ ഇവര്‍ സ്നേഹിതയിലെത്തുകയായിരുന്നു.സ്നേഹിത പ്രവര്‍ത്തകര്‍ ഇവരെ സംബന്ധിച്ച വിവരം നടക്കാവ് പോലീസില്‍ അറിയിച്ചു. തുടര്‍ന്ന നടക്കാവില്‍ പോയി കരിപ്പൂര്‍ പോലീസ് നാലു പേരെയും കൊണ്ടുവന്നു.നാലു പേരെയും കോടതിയില്‍ ഹാജരാക്കിയതായി എസ്.ഐ.കെ.ബി.ഹരികൃഷ്ണന്‍ പറഞ്ഞു.
വീട്ടമ്മയെയും മക്കളെയും കാണാതായത് പോലീസിന് തലവേദന സൃഷ്ടിക്കുന്നതിനിടെയാണ് ഇവരെ കണ്ടെത്താനായത്. മൊബൈല്‍ ഫോണ്‍ പോലും എടുക്കാതെയാണ് ഇവര്‍ വീടുവിട്ടിറങ്ങിയത്. ബീമാപള്ളി കേന്ദ്രീകരിച്ചും പോലീസ് ഇവര്‍ക്കു വേണ്ടി അന്വേഷണം നടത്തിയിരുന്നു.സുഹൃത്തിന്റെ ഫ്ളാറ്റില്‍ നിന്ന് പുറത്തിറങ്ങാത്തതിനാല്‍ പോലീസിന് ഇവരെ കുറിച്ച്‌ വിവരമൊന്നും ലഭിച്ചിരുന്നില്ല. ഇവര്‍ക്കായി പോലീസ് വിമാനത്താവളം,റെയില്‍വെ സ്റ്റേഷന്‍ അടക്കമുളള കേന്ദ്രങ്ങളിലെ സി.സി.ടി വി യടക്കം പരിശോധിച്ച്‌ അന്വേഷണം നടത്തിവരികയായിരുന്നു.
