മന്ത്രി കെ. ടി. ജലീലിന് നേരെ യൂത്ത് ലീഗ് – എം എസ് എഫ് പ്രവര്‍ത്തകരുടെ കല്ലേറ്

തിരൂര്‍: മലയാള സര്‍വ്വകലാശാല ചരിത്ര കോണ്‍ഫറന്‍സ് ഉദ്ഘാടനത്തിനെത്തിയ മന്ത്രി കെ. ടി. ജലീലിന് നേരെ യൂത്ത് ലീഗ് – എം എസ് എഫ് പ്രവര്‍ത്തകരുടെ കല്ലേറ്. കല്ലേറില്‍ 3 പോലീസുകാര്‍ക്ക് പരുക്കേറ്റു. വെള്ളിയാഴ്ച പകല്‍ 11.30 ഓടെയാണ് അക്രമമുണ്ടായത്. മന്ത്രി കെ ടി ജലീല്‍ ഉദ്ഘാടനത്തിനായി സര്‍വ്വകലാശാലയിലേക്ക് പോകുന്നതിനിടെ കവാടത്തില്‍ വച്ച്‌ യൂത്ത് ലീഗ് പ്രവര്‍ത്തകര്‍ കരിങ്കൊടി കാട്ടിയിരുന്നു. തുടര്‍ന്ന് ഉദ്ഘാടന ചടങ്ങിനിടെ ഹാളിലുളളില്‍ നിന്നും 4 പേര്‍ ബഹളമുണ്ടാക്കിയപ്പോള്‍ പോലീസ് അറസ്റ്റു ചെയ്തു നീക്കി.

തുടര്‍ന്ന് ഉദ്ഘാടനം കഴിഞ്ഞ് തിരിച്ചു പോകുന്നതിനിടെ ഗേറ്റില്‍ അക്രമികള്‍ തടഞ്ഞു. പറവണ്ണ, കൂട്ടായി അടക്കം തീരദേശമേഖലയില്‍ നിന്നുള്ള 50 ഓളം വരുന്ന സംഘമാണ്‌ തടഞ്ഞത്‌. പോലീസ് ഇവരെ വിരട്ടിയോടിക്കുന്നതിനിടെ അക്രമികള്‍ കല്ലറിയുകയായിരുന്നു. കല്ലേറ്റില്‍ റിസര്‍വ്വ് പോലീസ് സേനാംഗങ്ങളായ സുഹൈല്‍, ശരത്, നിഖില്‍ എന്നിവര്‍ക്ക് പരുക്കേറ്റു. തിരൂര്‍ പോലീസ് കേസെടുത്തു.