അന്തരീക്ഷ വായുവില്‍നിന്ന് ശുദ്ധജലം നിര്‍മിച്ചെടുക്കുന്ന യന്ത്രം വികസിപ്പിച്ചെടുത്ത എന്‍.ഐ.ടിയിലെ വിദ്യാര്‍ഥികളുടെ സ്റ്റാര്‍ട്ടപ്പ് സംരഭം ശ്രദ്ധേയമാവുന്നു
കോഴിക്കോട്: അന്തരീക്ഷ വായുവില്‍നിന്ന് ശുദ്ധജലം നിര്‍മിച്ചെടുക്കുന്ന യന്ത്രം വികസിപ്പിച്ചെടുത്ത കോഴിക്കോട് എന്‍.ഐ.ടിയിലെ പൂര്‍വ വിദ്യാര്‍ഥികളുടെ സ്റ്റാര്‍ട്ടപ്പ് സംരഭം ശ്രദ്ധേയമാവുന്നു. സ്വപ്നില്‍, സന്ദീപ്, പര്‍ധ സായി, വെങ്കിടേഷേ് എന്നീ നാല് പേരാണ് ഇതിന്‍റെ ആദ്യമാതൃക വികസിപ്പിച്ചത്. 2016ല്‍ എന്‍.ഐ.ടിയില്‍നിന്ന് പഠിച്ചിറങ്ങിയ ഇവര്‍ ബംഗളൂരുവില്‍ സ്ഥാപിച്ച ഉറവ് ലാബ്സ് എന്ന സ്റ്റാര്‍ട്ടപ്പ് സംരംഭമാണ് വരള്‍ച്ചയുടെ നാളുകള്‍ക്ക് പ്രതീക്ഷയേകുന്ന സംരംഭവുമായി രംഗത്തുവന്നത്. ഇത് സിവില്‍ സ്റ്റേഷനില്‍ പ്രവര്‍ത്തിപ്പിച്ച്‌ ജില്ലാ കളക്ടര്‍ എന്‍. പ്രശാന്തിന്‍റെ അഭിനന്ദനവും പിന്തുണയും നേടിയെടുക്കുകയും ചെയ്തു.
ചെലവ് ലിറ്ററിന് 1.2 രൂപയാക്കി കുറക്കാന്‍ കഴിയും. യന്ത്രം വികസിപ്പിച്ച്‌ പ്രതിദിനം 2,000 ലിറ്റര്‍ വെള്ളം ഉല്‍പാദിപ്പിക്കുകയാണ് ലക്ഷ്യം. അന്തരീക്ഷത്തിലെ ആര്‍ദ്രത 30 ശതമാനത്തിന് മുകളിലും താപനില 12 ഡിഗ്രി സെല്‍ഷ്യസിന് മുകളിലുമായാലാണ് യന്ത്രം പ്രവര്‍ത്തിക്കുക. ആര്‍ദ്രത 60 ശതമാനത്തോളമുള്ളതിനാല്‍ ഇത് നമ്മുടെ നാടിന് അനുയോജ്യമാണ്.
ഫില്‍ട്ടറിലൂടെ വായു ശുദ്ധീകരിക്കുന്നതിനാല്‍ ശുദ്ധജലമാണ് ലഭിക്കുകയെന്ന് ഇവര്‍ പറഞ്ഞു. യന്ത്രം പൂര്‍ണാര്‍ഥത്തില്‍ മെയില്‍ കോഴിക്കോട് പുറത്തിറക്കാനാണ് ആലോചന. യന്ത്രത്തെ ഇന്‍റര്‍നെറ്റിലൂടെ ബന്ധിപ്പിച്ച്‌ വെള്ളത്തിന്‍റെ ഗുണനിലവാരം, വായുവിന്‍റെ ഗുണനിലവാരം, കാലാവസ്ഥ എന്നിവ പരിശോധിക്കാന്‍ കഴിയും. പൊതുസ്ഥലങ്ങളില്‍ യന്ത്രം സ്ഥാപിച്ച്‌ കുടിക്കാനുള്ള വെള്ളം ലഭ്യമാക്കുകയാണിവരുടെ ലക്ഷ്യം.
