ബാലുശ്ശേരി പോലീസിന്‍റെ സമയോചിതമായ ഇടപെടലിലുടെ സ്ത്രീക്ക് പുനര്‍ജന്മം
ബാലുശ്ശേരി പോലീസിന്‍റെ സമയോചിതമായ ഇടപെടലിലുടെ സ്ത്രീക്ക് പുനര്‍ജന്മം. ആത്മഹത്യ ചെയ്യാനൊരുങ്ങിയ സ്ത്രീയെയാണ് ജീവിതത്തിലേക്ക് തിരികെ കൈപിടിച്ചുയര്‍ത്തിയത്. ബാലുശ്ശേരി പോലീസ് സ്റ്റേഷനിലെ ജി.ഡി ചാര്‍ജ് ഗോകുല്‍രാജിന് പയ്യോളി പോലീസ് സ്റ്റേഷനില്‍ നിന്ന് ആദ്യ ഫോണ്‍ സന്ദേശം വന്നതോടെയാണ് സ്ത്രീ ആത്മഹത്യചെയ്യാനൊരുങ്ങുന്നതായ വിവരം ലഭിക്കുന്നത്. സ്ത്രീ തന്നെയാണ് ആദ്യം ഈ കാര്യം പയ്യോളി സ്റ്റേഷനിലേയ്ക്ക് വിളിച്ചറിയച്ചത്. സ്ത്രീയുടെ ഫോണ്‍ നമ്പര്‍ ചോദിച്ചു മനസ്സിലാക്കി ഒട്ടും സമയം കളയാതെ സ്ത്രീയുടെ ഫോണിലേക്ക് ബാലുശ്ശേരി സ്റ്റേഷനിലെ ജി.ഡി ചാര്‍ജായിരുന്ന ഗോകുല്‍രാജ് ഫോണ്‍ മുഖാന്തരം ബന്ധപ്പെട്ടുകയായിരുന്നു.
.
.
കടുത്ത മാനസിക സംഘര്‍ഷത്തിലായിരുന്ന അവര്‍ തീര്‍ത്തും നിഷേധാത്മകമായാണ് സംസാരിച്ചത്. ഫോണിലൂടെ സമാധാനപ്പെടുത്താന്‍ ശ്രമിച്ചെങ്കിലും ഫലം കണ്ടില്ല. കുടുംബ പ്രശ്നമാണ് ആത്മഹത്യയ്ക്ക് കാരണമെന്ന് ഫോണ്‍ സംഭാഷണത്തിലൂടെ മനസ്സിലാക്കുകയും ഈ വിവരം ഉടന്‍തന്നെ സ്റ്റേഷന്‍ ഹൗസ് ഓഫീസര്‍ ദിനേശ് ടി പി യെ അറിയിച്ചു. അദ്ദേഹവും സംഘവും ഫോണ്‍ നമ്പര്‍ കേന്ദ്രീകരിച്ച് ലൊക്കേഷന്‍ മനസ്സിലാക്കി സ്ത്രീയുടെ വീട് ലക്ഷ്യമാക്കി ഉടന്‍തന്നെ പുറപ്പെട്ടു. വീടിന് പരിസരത്തെത്തി നാട്ടുകാരുടെ സഹായത്തോടെ വീട് കണ്ടുപിടിച്ചു.
.
വീട് അകത്തുനിന്നും ലോക്ക് ചെയ്തിരിക്കുകയായിരുന്നു. വാതില്‍ ചവിട്ടിത്തുറന്ന് അകത്തുകയറിയ പോലീസ് സംഘം കണ്ടത് മുറിയില്‍ തുണിയില്‍ തൂങ്ങിനില്‍ക്കുന്ന സ്ത്രീയെയായിരുന്നു. കൂടാതെ അവരുടെ ഒന്‍പതുമാസം മാത്രം പ്രായമുള്ള മകളും സമീപത്തുണ്ടായിരുന്നു. തുണി അറുത്തുമാറ്റി സ്ത്രീയെ രക്ഷിക്കുകയും പ്രാഥമിക ശുശ്രൂഷ നല്‍കിയ ശേഷം കോഴിക്കോട് മെഡിക്കല്‍ കോളേജിലേക്ക് മാറ്റുകയും ചെയ്തു. കുട്ടിയെ സുരക്ഷിതമായി പിതാവിന്‍റെ മാതാപിതാക്കളെ ഏല്‍പ്പിക്കുകയും ചെയ്തു.
.
.
ആശുപത്രിയില്‍ ചികിത്സയിലുള്ള സ്ത്രീ സുഖം പ്രാപിച്ചു വരുന്നു. ബാലുശ്ശേരി പോലീസ് സ്റ്റേഷന്‍ ഇന്‍സ്പെക്ടര്‍ ദിനേശ് ടി.പി, അസിസ്റ്റന്‍റ് സബ് ഇന്‍സ്പെക്ടര്‍ സുജാത. കെ, സീനിയര്‍ സിവില്‍ പോലീസ് ഓഫീസര്‍മാരായ ഗോകുല്‍രാജ് ഐ, ജംഷാദ് പി കെ, അനൂപ് ജി എസ് എന്നിവരടങ്ങിയ സംഘമാണ് അവസരോചിതമായി പ്രവര്‍ത്തിച്ച് മാതാവായ സ്ത്രീയുടെ ജീവന്‍ രക്ഷിച്ചത്.
