പൊലീസുകാർക്കിടയിലെ ആത്മഹത്യ; ജോലി ഭാരവും സമ്മർദ്ദവും കുറയ്ക്കാൻ സർക്കുലർ
പൊലീസുകാർക്കിടയിൽ ആത്മഹത്യ വർധിക്കുന്നതിൻ്റെ പശ്ചാത്തലത്തിൽ ജോലി ഭാരവും സമ്മർദ്ദവും കുറയ്ക്കാൻ പ്രത്യേക സർക്കുലർ പുറത്തിറക്കി. ആത്മഹത്യ പ്രവണത ഉള്ളവർക്ക് പ്രത്യേക കൗൺസിലിംഗ് നൽകണമെന്ന് സർക്കുലറിൽ പറയുന്നു. പൊലീസുകാരിലെ ആത്മഹത്യകളും ആത്മഹത്യാപ്രവണതകളും അടുത്തകാലത്തായി വര്‍ധിക്കുന്നതായാണ് റിപ്പോര്‍ട്ടുകള്‍.
ഇത് കുറയ്ക്കുന്നതിനായി കൗണ്‍സിലിങ് ആണ് പ്രധാനമായും സര്‍ക്കുലര്‍ മുന്നോട്ട് വയ്ക്കുന്നത്. അഡീഷണല്‍ ചീഫ് സെക്രട്ടറിയാണ് സര്‍ക്കുലർ ഇറക്കിയിരിക്കുന്നത്. പരാതികളും വിഷമങ്ങളും അവതരിപ്പിക്കാന്‍ സ്‌റ്റേഷനില്‍ മെന്ററിങ് സംവിധാനം വേണമെന്നും അര്‍ഹമായ അവധികള്‍ നല്‍കണമെന്നും ആഴ്ചയില്‍ ഒരു ദിവസം യോഗ പോലുള്ള പരിശീലനങ്ങള്‍ നല്‍കണമെന്നും സര്‍ക്കുലറില്‍ പറയുന്നു.
വീക്ക്‌ലി ഓഫ്, വിവാഹവാര്‍ഷികത്തിനും കുട്ടികളുടെ ജന്മദിനത്തിനും അവധി തുടങ്ങിയവ കൃത്യമായി നല്‍കണമെന്നതാണ് മറ്റൊരു പ്രധാനപ്പെട്ട നിര്‍ദേശം. മാനസികസമ്മര്‍ദമുണ്ടാകുന്ന പൊലീസുകാര്‍ക്ക് ഇത് കുറയ്ക്കുന്നതിന് സഹപ്രവര്‍ത്തകരുടെ സഹകരണമുണ്ടാകണമെന്നും സര്‍ക്കുലറില്‍ പറയുന്നു. ജീവിതശൈലി രോഗങ്ങളുള്ളവര്‍ക്ക് പ്രത്യേക പരിഗണന നല്‍കാനും സര്‍ക്കുലറില്‍ നിര്‍ദേശമുണ്ട്.
