ഹരിത വിദ്യാലയമാകാൻ കൊയിലാണ്ടി നഗരസഭയിലെ വിദ്യാലയങ്ങൾ ഒരുങ്ങുന്നു
കൊയിലാണ്ടി: ഹരിത വിദ്യാലയമാകാൻ കൊയിലാണ്ടി നഗരസഭയിലെ വിദ്യാലയങ്ങൾ ഒരുങ്ങുന്നു. ‘ശുചിത്വ കേരളം സുസ്ഥിര കേരളം’ എന്ന ലക്ഷ്യത്തിലേക്കായി മാലിന്യ മുക്തം നവകേരളം യാഥാർത്ഥ്യമാക്കുന്നതിനുള്ള വിപുലമായ ജനകീയ ക്യാമ്പയിൻ്റെ ഭാഗമാകാൻ 2024 ഒക്ടോബർ 2 ഗാന്ധി ജയന്തി ദിനത്തിൽ ആരംഭിച്ച് പ്രവർത്തനം പുരോഗമിക്കുന്നു. 2025 മാർച്ച് 30 (അന്താരാഷ്ട്ര സീറോ വേസ്റ്റ് ദിനം) ലക്ഷ്യം പൂർത്തീകരിക്കുന്നതിള്ള പ്രവർത്തനങ്ങൾ ഏകോപിപ്പിക്കുന്നതിൻ്റെ ഭാഗമായി നഗരസഭയിൽ ചേർന്ന യോഗത്തിൽ ചെയർപേഴ്സൺ സുധാ കെ പി അധ്യക്ഷത വഹിച്ചു. നഗരസഭ വൈസ് ചെയർമാൻ അഡ്വ. കെ സത്യൻ പദ്ധതി വിശദീകരിച്ചു.
നഗരസഭയിലെ മുഴുവൻ വിദ്യാലയങ്ങളിലെയും സ്കൂൾ ഹെഡ്മാസ്റ്റർമാരുടെയും പിടിഎ പ്രസിഡണ്ട് മാരുടെയും, ശുചിത്വ ചാർജ് വഹിക്കുന്ന അധ്യാപകരുടെയും യോഗത്തിലാണ് ഹരിത വിദ്യാലയം ആക്കുന്നതിന് തീരുമാനിച്ചിട്ടുള്ളത്. വിദ്യാഭ്യാസ സ്റ്റാൻഡിങ് കമ്മിറ്റി ചെയർപേഴ്സൺ നിജില പറവകൊടി, വികസനകാര്യ സ്റ്റാൻഡിങ് കമ്മിറ്റി ചെയർപേഴ്സൺ കെ. എ ഇന്ദിര ടീച്ചർ, കൗൺസിലർ രമേശൻ മാസ്റ്റർ, നഗരസഭ ക്ലീൻ സിറ്റി മാനേജർ ടി കെ സതീഷ് കുമാർ, ഹെൽത്ത് ഇൻസ്പെക്ടർ കെ റിഷാദ്, നവ കേരള മിഷൻ റിസോഴ്സ് പേഴ്സൺ നിരഞ്ജന എന്നിവർ സംസാരിച്ചു. നഗരസഭ പരിധിയിലെ മുഴുവൻ വിദ്യാലയങ്ങളിലെയും ശുചിത്വ അവബോധം വിദ്യാർത്ഥികളിൽ ഉണ്ടാക്കുന്നതിന്റെ ഭാഗമായി വിവിധ പദ്ധതികൾ ആസൂത്രണം ചെയ്തു നടപ്പിലാക്കുന്നതിന് യോഗത്തിൽ തീരുമാനമായി.
1. ഓരോ ക്ലാസിലെയും കുട്ടികളുടെ എണ്ണത്തിന്റെ 10% കുട്ടികളെ ഗ്രീൻ അംബാസിഡറായി നിയോഗിക്കുക
2. എല്ലാ തിങ്കളാഴ്ചയും എല്ലാ ക്ലാസുകളിലും ശുചിത്വ പ്രതിജ്ഞ ചൊല്ലുക
3. എല്ലാ ക്ലാസിലും ശുചിത്വ ക്വിസ് മത്സരങ്ങൾ നടത്തുക
4. ഓരോ ക്ലാസ് റൂമുകളിലും തരംതിരിച്ച് (പ്ലാസ്റ്റിക് വസ്തുക്കൾ / പേപ്പർ) വെക്കാനുള്ള ബിന്നുകൾ ഉണ്ടെന്ന് ഉറപ്പുവരുത്തണം. കൂടാതെ സ്കൂളുകളിൽ സ്ഥാപിച്ചിട്ടുള്ള കലക്ടേഴ്സ് അറ്റ് സ്കൂൾ ബിന്നുകളിൽ മാലിന്യങ്ങൾ വേർതിരിച്ച് സൂക്ഷിക്കുന്നു. എന്ന് ഉറപ്പുവരുത്തുകയും തരംതിരിച്ച് ശേഖരിച്ചവ എല്ലാമാസവും ഹരിത കർമ്മ സേനയ്ക്ക് യൂസർ നൽകി കൈമാറേണ്ടതുമാണ്.
5. ജൈവമാലിന്യങ്ങൾ കൃത്യമായി സംസ്കരിക്കുന്നു എന്ന് ഉറപ്പുവരുത്തുക
6. സ്കൂളും പരിസരവും ചെടികൾ നട്ട് സൗന്ദര്യപ്പെടുത്തുക
7. ജൈവ പച്ചക്കറി കൃഷി നടത്തുക
8. ഉപയോഗ ശേഷമുള്ള പേനകൾ ശേഖരിക്കുക
9. ശുചിത്വ സന്ദേശങ്ങൾ ഉൾക്കൊള്ളുന്ന ചിത്രരചന എല്ലാ ക്ലാസുകളിലും മത്സരം നടത്തുക
10. ശുചിത്വവുമായി ബന്ധപ്പെട്ട ഉപന്യാസങ്ങൾ എല്ലാ ക്ലാസിലും നടത്തുക
11. ഹരിത വിദ്യാലയമായി മാറ്റുന്നതിനുള്ള മറ്റ് പ്രവർത്തനങ്ങൾ നടത്തുക
12. മേൽ പ്രവർത്തനങ്ങൾ നടത്തിയതിന് കൃത്യമായ രേഖകൾ സൂക്ഷിക്കുക
13. കുട്ടികൾ ഭക്ഷണവും പാഴാക്കുന്നില്ല എന്ന് ഉറപ്പുവരുത്തി മിതവ്യയശീലം വളർത്തുക.
14. ഊർജ്ജ സംരക്ഷണത്തിൻ്റെ ഭാഗമായി ക്ലാസ് റൂമുകളിലെ ലൈറ്റും ഫാനും സൂക്ഷിച്ച് ഉപയോഗിക്കാനുള്ള ആകർഷകമായതും രസകരമായതുമായ സന്ദേശ / നിർദ്ദേശ ബോർഡുകൾ സ്ഥാപിക്കുക.
15. സ്കൂളിൽ കുട്ടികളുടെ കൂട്ടായ്മയിലൂടെ പച്ച തുരുത്തുകളോ ജൈവവൈവിധ്യ ഉദ്യാനങ്ങളും ശലഭോദ്യാനങ്ങളും നിർമ്മിച്ച് ആകർഷകമാക്കുകയും ക്യാമ്പസിലെ ചെടികളുടെയും മരങ്ങളുടെയും ശാസ്ത്രീയ നാമം അടക്കം പറയുന്ന ജൈവവൈവിധ്യ രജിസ്റ്റർ തയ്യാറാക്കുന്ന പ്രവർത്തനവും ഏറ്റെടുത്ത് കാര്യക്ഷമമാക്കുക.
16. ശൗചാലയങ്ങൾ ശുചിത്വമുള്ളവയാണെന്ന് ഗ്രീൻ അംബാസിഡർമാരുടെ ദിവസേനയുള്ള വിലയിരുത്തൽ നടപ്പിലാക്കണം.വൃത്തിയായി സൂക്ഷിക്കാൻ നിർദ്ദേശങ്ങൾ നൽകണം.
.
.
17. ജലസംരക്ഷണത്തിനായി കൈകഴുകുന്ന പൈപ്പിനടുത്ത് സന്ദേശ ബോർഡുകൾ സ്ഥാപിക്കുകയും മോണിറ്റർ ചെയ്യുകയും ചെയ്യാവുന്നതാണ്.
18. മലിനജലം പരന്ന് ഒഴുകി പരിസരം വൃത്തികേട് ആവുന്നില്ല എന്ന് ഉറപ്പുവരുത്തേണ്ടതാണ്.
19. സ്കൂളിൽ നടക്കുന്ന എല്ലാ യോഗങ്ങളിലും ആഘോഷങ്ങളിലും കലോത്സവങ്ങളിലും ഗ്രീൻ ഫോട്ടോകൾ പാലിക്കുന്നുണ്ടെന്ന് ഗ്രീൻ അംബാസിഡർമാർ ഉറപ്പുവരുത്തേണ്ടതാണ്.
20. നിശ്ചിത ഇടവേളകളിൽ ക്ലീനിങ് ഡ്രൈവർ നടത്തേണ്ടതാണ്.
21. സ്കൂളുകളിൽ ഹരിത വിദ്യാലയത്തിനായി നടത്തുന്ന എല്ലാ പ്രവർത്തനങ്ങളും കൃത്യമായി ഡോക്യുമെന്റേഷൻ ചെയ്തു റിപ്പോർട്ട് തയ്യാറാക്കി സൂക്ഷിക്കേണ്ടതുമാണ്
22. ശുചിത്വ ബോധം ഉളവാക്കുന്ന ശിൽപ്പങ്ങൾ ചിത്രങ്ങൾ, സന്ദേശങ്ങൾ, പാർക്കുകൾ, സ്നേഹാരാമങ്ങൾ, തുടങ്ങിയവ സ്കൂളുകളിൽ നിർമ്മിക്കുക.
നവംബർ ഒന്നിന് നഗരസഭയിലെ 50% വിദ്യാലയങ്ങളും ഹരിത വിദ്യാലയങ്ങൾ ആയി പ്രഖ്യാപനം നടത്തുമെന്നും, ഡിസംബർ മാസത്തിൽ മുഴുവൻ വിദ്യാലയങ്ങളിലും ശുചിത്വ മാലിന്യ സംസ്കരണം, ജൈവ പച്ചക്കറി കൃഷി, പച്ച തുരുത്ത്, ജലസംരക്ഷണം, ഊർജ്ജ സംരക്ഷണം, പരിസര ശുചിത്വം, വൃത്തിയുള്ള ശൗചാലയങ്ങൾ, മലിനജല സംസ്കരണം, ഗ്രീൻ പ്രോട്ടോകോൾ പാലനം എന്നിവയെ അടിസ്ഥാനമാക്കി പരിശോധന നടത്തി ഗ്രേഡ് ചെയ്ത് വിലയിരുത്തലിലൂടെ ഏറ്റവും നല്ല ഹരിത വിദ്യാലയത്തെ കണ്ടെത്തി “ഹരിത വിദ്യാലയ അവാർഡ്” നൽകുന്നതാണെന്ന് നഗരസഭ ചെയർപേഴ്സൺ സുധ കെ പി അറിയിച്ചു. ആരോഗ്യ സ്റ്റാൻഡിങ് കമ്മിറ്റി ചെയർപേഴ്സൺ സി പ്രജില സ്വാഗതം പറഞ്ഞു.
