ശബരിമല സ്വർണ്ണക്കൊള്ള: ശാസ്ത്രീയ പരിശോധന റിപ്പോർട്ട് ഇന്ന് അന്വേഷണ സംഘത്തിന് കൈമാറും
.
ശബരിമല സ്വർണ്ണ മോഷണക്കേസിലെ വി.എസ്.എസ്.സി (VSSC) ശാസ്ത്രീയ പരിശോധനാ റിപ്പോർട്ട് ഇന്ന് അന്വേഷണ സംഘത്തിന് കൈമാറും. വി.എസ്.എസ്.സി അധികൃതർ ഇന്നലെ കൊല്ലം വിജിലൻസ് കോടതിയിൽ സമർപ്പിച്ച മുദ്രവെച്ച റിപ്പോർട്ടാണ് ഇന്ന് കൈമാറുന്നത്. ഈ റിപ്പോർട്ടിലെ കണ്ടെത്തലുകൾ കേസിലെ തുടർനടപടികളിൽ അതീവ നിർണ്ണായകമാകും.
ശ്രീകോവിലിലെ സ്വർണ്ണപ്പാളികളിൽ അട്ടിമറി നടന്നിട്ടുണ്ടോ എന്ന് കണ്ടെത്താനാണ് പ്രധാനമായും പരിശോധന നടത്തിയത്. സ്വർണ്ണപ്പാളികൾ അതേപടി മാറ്റിയോ, സ്വർണ്ണത്തിന്റെ അളവിലും ഗുണനിലവാരത്തിലും കൃത്രിമം കാട്ടിയോ തുടങ്ങിയ കാര്യങ്ങൾ റിപ്പോർട്ടിലൂടെ വ്യക്തമാകും.
സ്വർണ്ണപ്പാളികൾ ഇളക്കി മാറ്റാതെ തന്നെ അവയുടെ ഘടനയും ഭാരവും കൃത്യമായി കണ്ടെത്താൻ സാധിക്കുന്ന അത്യാധുനിക സാങ്കേതിക വിദ്യയാണ് വി എസ് എസ് സി ഇതിനായി ഉപയോഗിച്ചത്. അന്വേഷണ സംഘം ശേഖരിച്ച തെളിവുകൾക്ക് ഈ റിപ്പോർട്ട് ശാസ്ത്രീയമായ അടിത്തറ നൽകും. സ്വർണ്ണത്തിന് പകരം മറ്റ് ലോഹങ്ങൾ ഉപയോഗിച്ചിട്ടുണ്ടോ എന്ന കാര്യത്തിൽ ഈ റിപ്പോർട്ടോടെ വ്യക്തത വരും.
