സൗജന്യ നേത്ര പരിശോധന ക്യാമ്പ് സംഘടിപ്പിച്ചു
കൊയിലാണ്ടി: നടുവത്തൂർ ശ്രീ വാസുദേവ ആശ്രമ ഗവ. ഹയർ സെക്കണ്ടറി സ്കൂൾ ഗൈഡ്സ് യൂണിറ്റും കോഴിക്കോട് ട്രിനിറ്റി കണ്ണാശുപത്രിയും സംയുക്തമായി സൗജന്യ നേത്ര പരിശോധന ക്യാമ്പ് സംഘടിപ്പിച്ചു. നവംബർ 6 ബുധനാഴ്ച കാലത്ത് 10 മണി മുതൽ ഉച്ചക്ക് 2 മണി വരെയാണ് ക്യാമ്പ് നടത്തിയത്. ക്യാമ്പിൻ്റെ ഉദ്ഘാടനം കീഴരിയൂർ പഞ്ചായത്ത് വൈസ് പ്രസിഡണ്ട് എൻ എം സുനിൽ നിർവഹിച്ചു.
സ്കൂൾ പി ടി എ വൈസ് പ്രസിഡണ്ട് ഒ കെ സുരേഷ് അധ്യക്ഷത വഹിച്ചു. മദർ പി ടി എ വൈസ് പ്രസിഡണ്ട് ബിന്ദു കെ, ഗൈഡ്സ് ക്യാപ്റ്റൻ ശിൽപ സി, സൗഹൃദ കോഡിനേറ്റർ സിന്ധു വി കെ, സ്റ്റാഫ് സെക്രട്ടറി രേഖ എൻ എന്നിവർ ആശംസ അർപ്പിച്ചു സംസാരിച്ചു. ട്രിനിറ്റി കണ്ണാശുപത്രി പി ആർ ഒ മാനേജർ ഫൈസൽ കെ. കെ ക്യാമ്പ് വിശദീകരണം നടത്തി. ഗൈഡ്സ് ലീഡർ ദേവപ്രിയ എം എം സ്വാഗതവും ഗൈഡ്സ് യൂണിറ്റ് അംഗം നിയാലക്ഷ്മി നന്ദിയും പറഞ്ഞു.
